Германскиот канцелар Олаф Шолц е убеден дека повторно ќе биде кандидат на неговата левичарска партија на општите избори следната година и покрај поразот што го претрпе на неодамнешните избори за Европскиот парламент, пишува денеска германската агенција dpa.
Шолц во денешното интервју за телевизијата АРД брзо одговори со „да“ на прашањето дали е сигурен дека ќе биде кандидат на социјалдемократите за канцелар на изборите во 2025 година.
Шолц го призна лошиот резултат што го постигнаа социјалдемократите и двете други партии во неговата владејачка коалиција, Зелените и Либералите, на европските избори на 9 јуни.
Трите партии заедно добија помалку од една третина од вкупниот број гласови. Но, Шолц рече дека не ги поддржува повиците за гласање доверба на неговата влада во парламентот и дека нема да бара предвремени избори.
<b>„Факт е дека Владата има мнозинство во парламентот“</b>
„Факт е дека владата има мнозинство во парламентот. Само оваа недела во Бундестагот донесовме закони и имаме мандат да ја исполниме и да ја завршиме нашата работа. Тоа го правиме“, рече Шолц, кој даде интервју пред заминувањето од самитот на групата Г7 во Италија.
Десничарската опозициска Христијанско-демократска партија победи на европските избори, а екстремно десничарската Алтернатива за Германија, исто така, оствари добивка.
