ПАК БУГАРСКА ПРОВОКАЦИЈА: Бугаринот Виктор Стојанов со забрана за влез во Македонија, организира панихида за Мара Бунева

Виктор Стојанов, претседател на фондацијата „Македонија“ и лице со забрана за влез во Македонија, повикува на 12 јануари повикуна на собир и панихида за Мара Бунева во црквата Свети Димитриј во Скопје. Оваа фондација ја имаше една од клучните улоги во минатогодишната манипулација со пописните резултати на Македонците во Албанија.

Настанот е закажан за 12 јануари во црквата Свети Димитриј во Скопје, со почеток во 11:30 часот, а во 12 часот, планиран е собир на кејот на реката Вардар за положување венци и цвеќиња.

Секоја година одбележувањето на годишнината од смртта на македонската револуционерка Мара Бунева предизвикува контроверзи во македонско-бугарските односи. Некогаш на овие собири имаше и физички пресметки.

За време на ваквите собири, македонски граѓани излегуваат во близина на овој собир и ја истакнуваат паролата „Немате свои херои – славите туѓи“.

На 13 јануари се навршуваат 97 години од атентатот што го извршила Мара Бунева врз српскиот државен обвинител Велимир Прелиќ во центарот на Скопје. Откако го извршила атентатот, таа се самоубила.

Пред две години на кејот на Вардар главен говорник на настанот беше бугарскиот европратеник од партијата ВМРО-БНД, Ангел Џамбаски, кој ги повика „владејачките елити во Северна Македонија да не ја продолжуваат политиката на геноцид кон Бугарите наложена од Коминтерната. Се собираме на кејот на Вардар за да ѝ оддадеме почит на големата Бугарка Мара Бунева и да укажеме поддршка на браќата Бугари во Македонија. Тука присуствуваат Бугари од различни делови, организации, но заедно сме да кажеме многу јасно на владејачките србомански политички елити да ги остават македонските Бугари. Да не ја продолжуваат политиката на геноцид кон Бугарите наложена од Коминтерната. Браќа Бугари во Македонија, ние Бугарите од Бугарија сме вашиот грб и потпора, нема да ве оставиме и нема да дозволиме никој да биде српечен како да се чувствува. Нема да дозволиме наметнување на туѓ културно-историски и политички модел на Бугарите во Македонија. Вечна слава на Мара Бунева и вечна слава на сите бугарски херои кои се бореа за ослободување на татковината и нејзино обединување“, рече лани на собирот во Скопје Џамбаски.

Присутните извикуваа „Бугари јунаци“ и „Мизија, Тракија, Македонија“. Последниот слоган е нивна порака за трите географски области кои според националистичките бугарски кругови ја сочинуваат „Голема Бугарија“.

Лани само десетина претставници на бугарската заедница во Македонија се собраа на кејот на Вардар во Скопје за да ја одбележат годишнината од смртта на Мара Бунева.

Мара Бунева е, родена 1902 година во Тетово. Основно училиште завршила во Тетово, а средно образование во Скопје. По аферата со затворањето и судењето на македонските студенти во Скопје од страна на српските власти, во 1927 година, Мара Бунева во знак на одмазда на 13 јануари 1928 година извршила атентат врз српскиот државен обвинител Велимир Прелиќ, на кејот на реката Вардар, кај Камениот мост во Скопје. Веднаш по атентатот, Бунева самата се застрелала за да не падне во рацете на српските окупаторски власти. На повредите им подлегнала ден подоцна, на 14 јануари.