Поранешниот претседател на УЕФА и легендарниот француски фудбалер Мишел Платини изнел револуционерна идеја. Платини смета дека се неопходни промени за да се направи фудбалот поатрактивен и предлага бројот на играчи на теренот да се намали од 11 на 10.
„Мојот предлог би бил да се намали бројот на играчи на теренот. Да се игра со 10 наместо со 11. Од 1900 година фудбал се игра со 11. Во тие дамнешни години се трчаше многу помалку, играчите беа аматери и тренираа далеку помалку, беа физички послаби, побавни... Мислам дека со намалување на бројот на играчи би се ослободиле простор за играње ќе имавме повеќе можности да видиме атрактивни потези и дуели еден на еден“, изјави Платини.
Платини истакнува дека фудбалот полека станува досаден.
„Луѓето од мојата генерација сè помалку гледаат фудбал. И децата, исто така. Едноставно не се пронаоѓаат во ваква игра. Денес имате повеќе додавања наназад отколку нанапред. Топката е предолго во посед на еден тим. Не критикувам, само велам дека постарата популација доживеала многу понапаѓачки фудбал“, изјави поранешниот претседател на УЕФА.