Претседателот на СДСМ, Венко Филипче, во интервју за „360 степени” оцени дека коалицијата со ДУИ во изминатите години сериозно ја оштетила позицијата на СДСМ. Тој потенцираше дека вредностите ќе бидат најважна основа за идните коалиции, нагласувајќи дека ваквите грешки нема да се повторат.
– Бевме сервилни кон нашите коалициски партнери, а тие ја злоупотребија нашата широчина. Не вреди да се остане во Влада или да се одржи Владата некој период подолго, а притоа сериозно да биде оштетена нашата позиција – рече Филипче.
Тој ја објасни оваа позиција како дел од научените лекции од минатото, кои веќе се имплементирани во новиот пристап на партијата.
– Да, ДУИ на некој начин ја трошеше и во значаен дел ја потроши СДСМ како дел од власта. Тоа не е само моја констатација, туку е дел од многу сериозна анализа која што ја направивме – изјави претседателот на СДСМ.
Филипче истакна дека партијата повеќе нема да прави компромиси кои би ја загрозиле нејзината иднина и принципите што ги застапува. Вредностите и интересите на граѓаните ќе бидат основата за секоја идна коалиција.
– Секоја идна коалиција ќе ја градиме врз основа на вредносните политики. Вакви компромиси, кои сериозно го оштетија нашиот интегритет, нема да се повторат – нагласи тој.
СДСМ останува посветена на зајакнување на својата позиција како прогресивна партија која ќе ја предводи Македонија со политики засновани на транспарентност, отчетност и вистинска грижа за интересите на граѓаните, уверува Филипче.
Тој ја објасни логиката зад изборот на новото раководство на партијата, подвлекувајќи дека процесот бил темелен и консултативен, со цел на површина да излезат најдобрите луѓе кои ќе го носат СДСМ напред.– Ова е причината зошто толку долго се чекаше на ново раководство. И членството и симпатизерите, секако и граѓаните, очекуваа да се донесат нови луѓе на раководните места во партијата. Тоа е процес којшто зема време. Саати и саати состаноци во општинските организации беа неопходни за да се идентификуваат вистинските луѓе кои вредат – рече Филипче.
