Едно од најчестите прашања за време на празниците беше како
да пиете вино, а да не страдате од главоболка следниот ден. Научниците долго
време ги истражуваат причините за овој проблем, а најновото истражување конечно
дава некои одговори.
Постојат четири основни механизми преку кои алкохолот
предизвикува главоболки: дехидрација – алкохолот делува како диуретик, што може
да доведе до губење на течности; ацеталдехид - токсичен нуспроизвод на
разградувањето на алкохолот што предизвикува воспаление и непријатност,
цитокини - алкохолот ги зголемува нивоата на овие молекули во имунолошкиот
систем, што дополнително придонесува за воспаление, и конгенерите - супстанции
како што се метанол, феноли, сулфити, биогени амини и танини , кои му даваат на
виното специфичен вкус, мирис и боја, може да бидат проблематични за
чувствителните поединци.
<b>Улогата на сулфитите</b>
Сулфитите, природно присутни во виното, но и дополнително
користени при производството, често се на мета кога се зборува за главоболки.
Истражувањата, сепак, покажуваат дека и белите и црвените вина содржат слични
количества сулфити и дека храната со високо ниво на сулфити, како што е сувото
овошје, обично не предизвикува слични симптоми.
<b>Биогени амини и
танини</b>
Биогените амини, како што се хистаминот и тираминот, често
се поврзуваат со главоболки. Нивното количество во вино, сепак, обично е
премногу ниско за да биде клучен фактор.
Од друга страна, танините, кои се присутни во лушпите и
семките на грозјето, почесто се наоѓаат во црвените вина отколку во белите
вина. Истите танини, сепак, се наоѓаат и во чајот и чоколадото, кои ретко
предизвикуваат главоболки.
<b>Фокусирајте се на
кверцетинот</b>
Нова линија на истражување укажува на улогата на
кверцетинот, природен антиоксиданс присутен во лушпите од грозје. Црвените
вина, кои ферментираат подолго во контакт со лушпите од грозје, содржат
поголеми количини од ова соединение.
Истражувањата покажуваат дека кверцетинот може да го забави
дејството на ензимот ALDH, кој е клучен за разградување на ацеталдехидот, а со
тоа го зголемува нивото на оваа токсична супстанција во телото, што предизвикува
главоболки и воспаление.
<b>Влијанието на
процесот на мацерација</b>
Мацерацијата е процес во кој грозјето останува во контакт со
лушпите за време на ферментацијата. Подолгото мацерирање ги зголемува нивоата
на кверцетин, танини и феноли во виното. Вината како Каберне Совињон и Сирах се
подложени на подолги мацерации, додека полесните вина како Пино Ноар содржат
помалку од овие соединенија, што ги прави посоодветни за луѓе чувствителни на
феноли.
<b>Како да избегнете
главоболка?</b>
Ако сте чувствителни на тешки црвени вина, обидете се да
изберете вина со пократок период на мацерација, да комбинирате вино со храна,
бидејќи храната ја забавува апсорпцијата на алкохол и да пиете доволно течности
за да спречите дехидрација.
Иако хипотезата за улогата на кверцетинот изгледа привлечна,
експертите истакнуваат дека се потребни дополнителни истражувања за да се
потврдат овие наоди кај луѓето. Во секој случај, клучот лежи во умереноста и
правилната хидратација.
