Нетанјаху се сретна со Трамп, републиканскиот кандидат во претседателската трка во САД, еден ден по разговорите со демократскиот претседател Џо Бајден и потпретседателката Камала Харис, кои ќе се натпреваруваат против Трамп на изборите на 5 ноември.
Трамп ги прими Нетанјаху и неговата сопруга Сара во одморалиштето Мар-а-Лаго на Флорида. На средбата беше критикувана Харис, која по средбата со израелскиот лидер изрази загриженост за палестинските цивилни жртви во израелската воена кампања во Газа.
„Мислам дека нејзините забелешки се навредливи“, рече Трамп. Нетанјаху рече дека се надева оти неговото патување во САД ќе доведе до побрз договор за прекин на огнот. „Се надевам дека е така. Но, мислам дека времето ќе покаже“, изјави Нетанјаху за новинарите.
Нетанјаху го налути Трамп кога му честиташе на Бајден за неговата победа над него на изборите во 2020 година. Тој неодамна го критикуваше Нетанјаху за израелските безбедносни пропусти што му дозволија на Хамас да изврши напад врз Израел на 7 октомври што ја предизвика израелската офанзива во Газа.
Трамп сега отфрли каква било сугестија за тензија со Нетанјаху. „Имаме многу добри односи“, рече тој, укажувајќи на промените во политиката за време на неговото претседателствување, вклучително и преместување на американската амбасада од Тел Авив во Ерусалим и повлекување на САД од меѓународниот нуклеарен договор со Иран.
Според анкетите, Харис и Трамп се во мртва трка за Белата куќа, што ги натера светските лидери како Нетанјаху, традиционално полојални на републиканците на Трамп отколку на демократите на Бајден, да постигнат рамнотежа во односите со САД.
