Се прогнозира дека сувите ветрови Санта Ана, со брзина од 50 до 70 милји на час, ќе продолжат до среда, соопшти Националната метеоролошка служба, издавајќи црвено предупредување за „особено опасни услови“.
Гувернерот на Калифорнија, Гевин Њусом, рече дека државата претходно распоредила пожарникари во најранливите области во текот на викендот, вклучувајќи ги и оние околу пожарите во Палисадес и Итон, двата најголеми што избувнаа во Јужна Калифорнија. Најмалку 24 лица загинаа во пожарите што избувнаа минатиот вторник.
Пожарот претвори цели населби во урнатини кои тлеат, оставајќи зад себе апокалиптичен пејзаж. Официјални лица тврдат дека најмалку 12.300 објекти биле уништени или оштетени. Њусом рече дека огнената бура би можела да биде најразорната природна катастрофа во американската историја, бидејќи уништила илјадници домови и принудила евакуација на десетици илјади жители. Приватната метеоролошка организација AccuWeather ја процени штетата меѓу 135 и 150 милијарди американски долари.
Враќањето на силните ветрови го загрозува тешко постигнатиот напредок што го постигнаа противпожарните служби во контролирањето на пожарот. Во текот на викендот, пожарникарите на земја и од воздух успеаја да го запрат пожарот Палисадес додека се приближуваше до луксузната населба Брентвуд и напредуваше кон густо населената долина Сан Фернандо на север.
Пожарот во Итон во подножјето источно од Лос Анџелес изгоре 57 квадратни километри, но пожарникарите контролираа 33 отсто од пожарот.
Северно од градот, пожарникарите го ставија пожарот во Херст под контрола на 89 отсто и целосно задржаа три други пожари кои зафатија други делови на државата, соопшти Одделот за шумарство и противпожарна заштита во Калифорнија.
Очекувајќи враќање на силните ветрови, властите го предупредија целото население на округот Лос Анџелес од речиси 10 милиони да биде подготвено за евакуација. Од вчера попладне, наредбите за евакуација беа на сила за повеќе од 100.000 луѓе, што е помалку од претходните 150.000.
Припадниците на вооружените сили се подготвени да помогнат во борбата против пожарите, рече Дин Крисвел од Федералната агенција за управување со вонредни состојби (ФЕМА) во серија телевизиски интервјуа, повикувајќи ги жителите да почнат да се регистрираат за помош при катастрофи.
Пожарникарите од седум држави, Канада и Мексико веќе пристигнаа во областа на Лос Анџелес за да им помогнат на противпожарните станици во Калифорнија. Во Алтадена, на работ на пожарот Итон, Тристин Перез рече дека никогаш не ја напуштил својата куќа, игнорирајќи ги полициските наредби да се евакуира додека огнот се спушта по ридовите.
Перез претпочитал да се обиде да го спаси својот имот и куќите на своите соседи. „Вашиот двор гори, палмите горат, изгледаше како нешто од филм“, рече Перез во интервју за Ројтерс пред неговиот дом. „Направив сѐ што можев да го запрам огнот што се шири и да ја спасам мојата куќа, да помогнам да се спасат нивните куќи“.
