Германија нема да ги укине ограничувањата за употреба на западно оружје со долг дострел дадено на Украина, изјави германскиот канцелар Олаф Шолц.
Овој став на Германија нема да се промени дури и ако САД ги укинат ограничувањата, додаде тој непосредно пред средбата во Њујорк со претседателот на Украина Володимир Зеленски.
„Секогаш сме фокусирани да го поддржиме она што е неопходно и што навистина помага. Сигурно е дека нема да ги укинеме ограничувањата и имаме многу добри причини за тоа“, рече германскиот канцелар.
„Истовремено, многу е важно ЕУ итно да и ја обезбеди на Украина ветената помош од 35 милијарди евра. Исто така е важно од оваа причина нашите сојузници од САД, Канада, Велика Британија и Јапонија да продолжат да ги следат таквите примери“, изјави 66-годишниот Шолц.
Од друга страна, како што ја пренесува Индекс изјава дал и украинскиот претседател во интервју за американската ТВ АБЦ Њуз.
„Се поблиску сме до крајот на војната, поблиску отколку што мислиме.“
И во таа прилика Зеленски повторно ги повика Вашингтон и другите партнери да продолжат да ја поддржуваат Украина бидејќи, како што рече, „само силната позиција на Украина може да го охрабри рускиот претседател Путин да ја прекине војната“.
За потсетување, Зеленски од недела е во САД, каде што ќе учествува на седницата на Генералното собрание на ОН, а престојот во Америка ќе го искористи за бројни средби со светските лидери, а ќе разговара и со актуелните американски кандидати за нов претседател Камала Харис и Доналд Трамп.