Иран изгради повеќе од 10 километри ѕид на границата со Авганистан, главниот премин за мигрантите од таа земја, изјави денеска претставник на армијата, а пренесуваат локалните медиуми.
„На границата (со Авганистан) се изградени повеќе од 10 километри ѕид, а планирани се уште 50 километри“, изјави заменик-командантот на иранските копнени сили, Нозар Немати.
На 9 септември министерот за внатрешни работи Ескандар Момени најави целосно затворање на границите, објаснувајќи дека Иран „повеќе не е во состојба да прифати толку голем број авганистански имигранти“.
Според владините податоци, во Иран има „повеќе од 2,7 милиони авганистански бегалци со регулиран статус“ или „97 отсто од вкупниот број мигранти кои легално престојуваат во таа земја“.
Властите во Техеран не го објавија вкупниот број авганистански мигранти во Иран, но еден пратеник неодамна процени дека има „меѓу шест и седум милиони“.
Иран дели повеќе од 900 километри граница со Авганистан.
