На листата на санкционирани поради заобиколување на санкциите се и деловни субјекти надвор од ЕУ, вклучително и од Кина, Индија, Србија, Иран и Обединети Арапски Емирати.
Новите мерки треба да го решат проблемот со заобиколување на санкциите и да ја таргетираат руската „флота од сенка“. Овие мерки треба да придонесат за слабеење на рускиот воен и индустриски комплекс.
„Овој пакет санкции е дел од нашиот одговор кој има за цел да ја ослабне руската воена машина и оние кои ја овозможуваат војната, вклучително и кинеските компании“, рече високата претставничка на ЕУ за надворешна политика и безбедност Каја Калас.
Таа рече дека ЕУ ќе биде со Украинците на сите фронтови - хуманитарен, економски, политички, дипломатски и воен. „Нема сомнеж дека Украина ќе победи“, рече Калас.
Конкретно, Советот на ЕУ се согласи на листата на санкциoнирани да додаде 54 лица и 30 ентитети одговорни за активности кои го поткопуваат или претставуваат закана за територијалниот интегритет, суверенитет и независноста на Украина.
Меѓу санкционираните се лица одговорни за депортација на деца и пропаганда, како и високи менаџери во водечки енергетски компании.
Кај ентитетите, главната цел на ЕУ се руските одбранбени компании и бродски компании одговорни за транспорт на нафта и нафтени производи по морски пат, кои обезбедуваат важни приходи за руската Влада. На списокот се наоѓаат и хемиска фабрика и цивилна руска авиокомпанија.
