<span style="color: rgb(0, 0, 0); font-family: sans-serif; font-size: 17.6px; text-align: justify;"></span>Три од четирите најавени локомотиви од Србија пристигнаа во земјава, две се веќе приклучени на товарните возови, а четвртата се очекува да пристигне вечерва, посочи првиот човек на МЖ-Транспорт Дејан Кошутиќ.
Кошутиќ вели целта е да се поддржат нашите четири „тазе“ оспособени вагони, за побргу да се откочи затекнатиот застој на Гевгелија и Табановце, како и да може да се одговори на големата побарувачка за транспорт кој доаѓа и од север и од југ.
-За жал, ние начекавме девастирана ситуација каде што се деси застој на товарниот сообраќај баш на нашиот дел и всушност овие четири беа само за премостување за побргу да го оспособиме и за да бидеме спремни да примиме, бидејќи веќе во моментов се спремаат 10тина возови како во Пиреја, така во Атина, а за север да не говориме, што треба да одат кон пристаништето во Солун, објаснува Кошутиќ.
Според вицепремиерот и министер за односи меѓу заедниците Иван Стоилковиќ, функционирањето на овој коридор ќе донесе сериозен економски бенефит за земјава, како и стабилност за вработените во железници.
Стоилковиќ за Канал 5 вели дека договорот е од комерцијален карактер и дека не е дел од компензација, а локомотивите ќе бидат на располагање кога и да имаме потреба од нив.
- Коридорот 10 е пулсна жила на македонското стопанство, затоа што коридорот 10 носи економски бенефиции за македонските граѓани, пред се. Од тој аспект, оваа активност е, пред се, ставање во функција на МЖ, од една страна, и, од друга страна, подготовки за отпочнување на реализација на еден многу голем проект, а тоа е брзи пруги низ Македонија. Успеавме МЖ да ги ставиме во погон, а ставањето во погон на МЖ, пред се, значи дека ќе бидат спасени 1900 работни места и МЖ ќе можат да си обезбедат лични доходи за своите вработени кои ќе бидат ликвидни во целата новонастаната состојба, истакна Стоилковиќ.
Во преговорите со Србија за овој договор учествувале и премиерот Мицкоски и министерот за транспорт Николоски, посочи Стоилковиќ. Во меѓувреме, пак, во гаражите, како што вели, се работи на оспособување и на останатите локомотиви од возниот парк за да се пуштат во сообраќај.