Според виденото со години наназад Унгарија, заедно со Словенија и Хрватска се државите од Европската Унија кои најмногу се обидуваат да ја афирмираат Македонија во фазата пред а, потоа, и при преговорите за членство во ЕУ. Оттаму, Унгарија заслужи посебен статус на почитување од страна на македонската држава и дипломатија, и во овие шест месеци кога Унгарија претседава со Советот на ЕУ таа соработка може да постигне големи ефекти.
Заменик претседателот на Владата и министер за транспорт, Александар Николоски, денеска оствари работна средба со Амбасадорот на Унгарија, Андраш Клајн.
На средбата министерот Николоски упати честитки за преземањето на претседателството со Советот на ЕУ од страна на Унгарија, со порака дека Владата останува силно фокусирана на европската агенда.
Исто така министерот Николоски ги потенцираше реформските процеси, истакнувајќи ги плановите на Владата за регионална интеграција и зајакнување на односите со земјите од Западен Балкан.
На средбата се разменија информации околу искуствата за модернизација на регионалната инфраструктура, со посебен фокус на патната и железничката инфраструктура.
-Во Унгарија гледаме како долгогодишен партнер и пријател и огромна е поддршката што ја овозможува Унгарија за евроинтегративниот процес како врвен приоритет, потенцираше на средбата министерот Николоски.
И двајцата се согласија за натамошно зајакнување на билатералните односи и интензивирање на соработката во области од заеднички интерес за двете земји.
