Родилка на 31-годишна возраст починала вчера навечер во кумановската болница, а новороденчето е итно префрлено во Клиниката за гинекологија и акушерство во Скопје.
Од здравствените институции засега нема официјални информации за текот на бременоста и за состојбата на новороденчето.
Причината за смртта на родилката ќе ја испитува судска медицина.
„На 27.9.2024 во 21.35 часот во СВР Куманово, директорот на Општа болница Куманово пријавил дека на Одделението за гинекологија во болницата починала 31-годишна родилка од Куманово. Увид извршиле екипа од СВР Куманово и јавен обвинител, по чија наредба телото на починатата било дадено на обдукција“, соопшти СВР Куманово.
Таа во болницата била примена завчера.
– Вчера се случи еден трагичен настан, при породување на 31-годишна возраст, родилка ненадејно почина. Родилката е примена завчера, со прснат водењак, со почнато породување, со слаби контракции и е почекано да се добијат спонтани контракции по природен пат за да продолжи породувањето. Чекано е до вчера и вчера е почнато со стимулација. Кога е почнато со стимулацијата нагло е настанат престанок на срцева работа, немерлив притисок, викнат е анестезиолог за реанимација. При обидот за реанимација не е добиена срцева акција и крвен притисок и веднаш е внесена во салата за операции, за да се извади плодот. Бебето е извадено живо и е итно однесено во ургентниот центар на Детската клиника во Скопје, проследено целиот пат од нашиот неонатолог кој бил дежурен – изјави директорот на кумановската општа болница Стефан Трајановски.
Раководителот на акушерското одделение го известил директорот, кој по информативниот разговор со дежурната екипа веднаш повикал обвинител кој пристигнал до истражна екипа.
– Детално е извршен увид, земени се изјави од сите што биле во контакт со родилката. Додека траело породувањето имало двајца дежурни лекари, дежурна анестезиолошка екипа, а во актот на вадењето на бебето стигнал и раководителот на одделот. Бебето е живо – рече Трајановски.
Тој повтори дека Обвинителството повело истрага и обдукцискиот наод ќе ги покаже причините за смртта на родилката. Доколку има лекарска грешка, Трајановски најави и професионална одговорност.
– Поведена е од страна на Обвинителството истрага, бидејќи е ова ненадејна смрт со неутврдена причина. Покрената е истрага, ќе има обдукцискиот наод и ќе биде утврдено точно како и зошто е настаната оваа случка. Кога ќе ги добијам наодите, ќе има и професионална одговорност, ако биде утврдена лекарска грешка, од наши професионални организации. Ова ѝ е второ породување, првото минало без компликации, детенцето е живо и здраво. Со втората бременост можам да споделам дека било откриено гестациски дијабет – изјави Трајановски.
Од СВР Куманово претходно информираа дека кај нив случајот за починатата 31-годишна родилка го пријавил директорот на болницата во 21. 35 часот Увид извршиле екипа од СВР Куманово и јавен обвинител, по чија наредба телото на починатата било дадено на обдукција.
Обвинителство од Куманово ја обезбедило целокупна медицинска документација за водењето на бременоста.
