Демири најави КАЗНИ ЗА АНТИВАКСЕРИТЕ, медицинската елита со поддршка за вакцинацијата

Потребно е да се донесат законски измени за казнување на луѓето кои поттикнуваат кампањи против вакцинација, ова денеска го изјави министерот за здравство Илир Демири, кој јавно се обврза дека ќе преземе мерки да се утврди како е основано Здружението на антиваксери и по кој законски принцип функционира. Според него, секоја изјава во медиумите треба да се проследи и, како што вели, да се види точно кој стои зад антиваксерските кампањи. Демири довербата на граѓаните освен со казни за антиваксерите ќе ја враќа и со широк фронт за поддршка на имунизацијата. Вели, не смее да има лажни вести и дезинформации кои освен групи ги шират и лекари и затоа министерот ќе иницира и законски измени.

-Ќе влијаеме и со промена и со додавање на законски нормативи и ќе бидат казнети сите што потегнуваат кампањи против вакцинацијата, вели д-р Илир Демири, министер за здравство.

-Јас имам прочитано од една колешка, имам слушнато уште за една. Меѓутоа Фејсбук е сива зон, и ние, односно и други земји нема како да го спречат тоа, вели проф. д-р Калина Гривчева-Старделова, претседател на ЛКМ

Медицинската елита денеска во Лекарската комора стави потписи на декларација со која сакаат да испратат порака за важноста на имунизацијата особено во време кога имаме епидемија на голема кашлица во главниот град, а се заканува и епидемија од морбили поради нискиот опфат со МРП. Ако скопјани избегнуваат да одат во пунктовите, во Кичево опфатот е 96 и имаат свои методи како да допрат до родителите.

-Ние ги повикуваме родителите ако не го донесат детето, им се јавуваме. И законски и професионално се обидуваме да им помогнеме на овие родители да постапат правилно, вели д-р Џабир Бајрами, педијатар од Кичево.

Многу е опасно враќање на болести од минатото и не треба постојано да учиме од грешките, вели првиот човек на здравствениот систем. И лекарите со свои примери треба да покажат дека вакцинацијата е неопходна.

-Сите недоволно информирани пациенти се наша обврска, ние сме тие што треба да ги информираме што е безбедно. Еве јас им кажувам дека јас сум вакцинирана, и моите деца се вакцинирани, вели проф. д-р Калина Гривчева-Старделова.

Пред 4 години во епидемијата со морбили имавме 4 смртни случаи и околу 2000 заразени. Сега со епидемијата на голема кашлица бројките секојдневно растат. Минатата недела биле регистрирани 72 случаи, што е двојно повеќе од претходната.