Кога двојка чека бебе, често се случува да има расправии за посакуваното име, но тие расправии лесно може да се наречат слатки. Меѓутоа, една брачна двојка од јужната индиска држава Карнатака ја подигнала оваа ситуација на повисоко ниво и завршила на суд поради спор околу името на детето.
Битката за името на нивниот син траела три години, а во еден момент станала толку жестока што за малку ќе се развеле, но, за среќа, не дошло до тоа, пишува Би-би-си.
Имено, целата гужва започнала во 2021 година кога по породувањето жената отишла кај родителите, што е сосема нормално во Индија. Меѓутоа, по неколку недели, сопругот требало да оди да ги земе сопругата и синот, но се откажал бидејќи неговата сакана не се согласувала со неговиот избор на име.
Како што понатаму се наведува, мајката го нарекла својот син Ада - комбинација од првата буква од нејзиното име и дел од името на нејзиниот сопруг, но тој сепак инсистирал на својот избор. По една година откако не дошол да ги земе, жената се обратила до локалниот суд и побарала од сопругот да и обезбеди финансиска поддршка бидејќи била невработена, а во еден момент дури и се заканила со развод. Локалниот суд одлучил да го префрли случајот на таканаречениот Народен суд, кој е надлежен за случаите за порамнување. Иако судијата им дал бројни решенија, младиот брачен пар не се откажал.
За среќа, по долги три години конечно се договориле за името на детето - синот сега се вика Арјавардана, што значи „благороден“. Веднаш потоа сега веќе среќната двојка разменила традиционални венци кои се дел од индиската култура и симбол на прифаќање.
Она што е интересно е дека ова не е единствениот случај на пар кој завршил на суд поради изборот на име на детето. Минатиот септември, исто така, во Индија, едно дете било спречено да се запише на училиште бидејќи изводот од матичната книга на родените му бил празен. Како што објаснила мајката во судот, таа се обидела да го запише детето во матичната книга на родените, но официјалните лица одбиле да го сторат тоа бидејќи таткото на детето, со кого таа повеќе не била во брак, не бил присутен. Тогаш повисокиот суд и наложил на писарницата да го прифати предлогот за името на мајката, како и да го додаде името на таткото.
