Приврзаноста на Германците за готовина од година во година
се топи, така што во 2023 година само 51 отсто од сите плаќања биле извршени со
банкноти и монети, објави во понеделникот Бундесбанката.
Централната банка во опсежна, редовна студија за навиките за
плаќање на Германците рече дека тоа е за седум процентни поени помалку отколку
во претходното издание од 2021 година.
Плаќањата со дебитни картички се во пораст, а нивната
употреба е зголемена за пет поени, на 27 проценти. Зачестено е и плаќањето со
паметни уреди, со раст од четири проценти и проширување до шест проценти од
сите трансакции.
Според вредноста на плаќањата, дебитната картичка со учество
од 32 отсто првпат претекнала готовина, со што биле покриени 26 отсто од
прометот. Ова значи и дека луѓето плаќаат поголеми суми со картички.
Повеќе од две петтини од испитаниците, 44 отсто од нив,
рекле дека претпочитаат дебитни картички за плаќање.
Општо земено, безготовинското плаќање е се пораспространето.
Имено, за 80 отсто од сите плаќања можело да се плати со картичка или телефон,
20 отсто повеќе од 2021 година.
И покрај тоа, има простор за натамошно проширување на
практиката на безготовинско плаќање, изјави претседателот на одборот на
директори на Бундесбанк, Буркхард Балц (Балц).
Тој посочи дека речиси четвртина од анкетираните изјавиле
дека доживеале дека не можат да платат нешто со картичка или телефон.
Германските потрошувачи брзо се свртеа кон плаќање со
картички за време на пандемијата. Сепак, во оваа област, Германија продолжува
да заостанува зад другите западни земји.
Германците се држат за готовина затоа што не сакаат да се
откажат од приватноста на плаќањето, според Бундесбанката. Според мнозинството
од испитаниците, брзината и едноставноста се во прилог на безготовинското
плаќање.