Претседателот на Србија, Александар Вучиќ, денеска изјави дека не верува оти земјите кандидати од регионот ќе станат членки на ЕУ пред 2030 година, додавајќи дека до таа година Украина ќе биде првата следна земја што ќе влезе во Унијата.
- После тоа, верувам дека Србија, Албанија, Црна Гора и се надевам, ако Бугарите дозволат (Северна) Македонија да се приклучи, верувам дека и тие ќе се приклучат, но откако ќе се приклучи Украина. Во тоа верувам, ќе видиме дали сум во право или не - рече Вучиќ на панелот „Пристапување на Западен Балкан во ЕУ“ организиран во рамки на Глобалниот безбедносен форум „ГЛОБСЕК 2024“ во Прага.
Во одговор на другиот учесник на панелот, претседателот на Црна Гора Јаков Милатовиќ, кој изјави дека Србија испраќа нејасни пораки каде сака да биде, Вучиќ одговори дека и денес има многу јасна порака за европскиот пат, но и дека многу луѓе од регионот, заедно со некои други, секогаш инсистираше на тоа дека оваа порака не е доволно јасна, бидејќи се вклопува во нивниот наратив.
