Специјализираните хашки трибунали за Косово им го продолжија притворот за уште два месеци на поранешните лидери на ОВК Хашим Тачи и Кадри Весељи. Заедно со Тачи и Весељи, им се суди и на Реџеп Сељими и Јакуп Красниќи за воени злосторства и злосторства против човештвото.
Во решенијата е наведено дека нема доволно информации кои покажуваат дека обвинетите, доколку бидат ослободени од притвор, би можеле да ги избегнат судските органи, но постои ризик да го попречат спроведувањето на правдата и да извршат кривични дела против оние кои се сметаат за противници на ОВК, како и над сведоците кои сведочеа или можеа да сведочат во оваа постапка.
Судењето на поранешните лидери на ОВК започна на 3 април 2023 година, а обвинението ги товари Тачи, Весељи, Красниќи и Сељими за воени злосторства и злосторства против човештвото извршени во незаконски притвори на ОВК во Косово и Албанија. Тие се обвинети за неправедно лишување од слобода, мачење и убивање на луѓе.
Досега во постапката сведочеа 95 сведоци, а судењето ќе продолжи во понеделник на 21 октомври.