Портпаролката на руското Министерство за надворешни работи Марија Захарова денеска изјави дека луѓето кои ги претставувале европските земји пред 15 години биле многу похрабри да зборуваат за злосторства.
Како пример таа го наведе признанието на тогашната главна обвинителка на Хашкиот суд Карла дел Понте дека на територијата на АП на Косово и Метохија имало „нелегални трансплантации на органи“.
И покрај тешката ситуација, истакна Захарова, Карла дел Понте рече дека илегалната трговија со човечки органи била организирана на територијата на т.н. Косово, пренесува Спутник.
„Дали разбирате? Излегува дека луѓето кои тогаш ги претставуваа европските земји, не знам од кои причини, најдоа храброст да ја кажат вистината“, рече Захарова.
Податоците за трговијата со човечки органи прва ги објави поранешната обвинителка на Хашкиот трибунал, Карла дел Понте, во нејзината книга „Лов: јас и воените злосторници“, која ја објави по напуштањето на функцијата.
Таа изјави дека во 1999 година од новинарите дознала дека околу 300 Срби и други неалбанци биле киднапирани и транспортирани во Албанија, каде што им биле извадени органите, а потоа испратени во Италија и Велика Британија, од каде што биле дистрибуирани на клиниките низ Европа и Америка.
Во книгата таа го споменува селото Бурел во Албанија, каде што на жртвите им биле извадени органите во објект кој таа го нарекува „жолта куќа“.
Српското обвинителство, како и меѓународната организација за заштита на човековите права, Human Rights Watch, побараа од Албанија да започне истрага за наводите за трговија со органи на киднапираните Срби.
Според извештајот на Советот на Европа од 12 декември 2010 година, организатор на киднапирањето и трговијата со човечки органи бил Хашим Тачи и групата од дреничкиот округ, наведува Спутник.