Американскиот претседател Џо Бајден рече дека „апсолутно“ бара од Израел да престане да пука врз мировниците, по вториот напад врз персоналот на ОН за два дена.
Американскиот секретар за одбрана Лојд Остин во телефонски разговор со својот израелски колега ја истакна „важноста од обезбедувањето на безбедноста“ на силите на Обединетите нации, познати како УНИФИЛ, соопшти Пентагон.
По неколкунеделни засилени напади врз либанската милитантна група Хезболах, Остин исто така го повика Израел „што поскоро да премине од воените операции на дипломатски пат“.
Израел, исто така, се најде под тешки критики во Европа. Во заедничката изјава, лидерите на Италија, Франција и Шпанија го изразија својот „гнев поради неоправданите напади на Израел“ врз мировниците и побараа тие „веднаш да престанат“. Германското Министерство за надворешни работи го нарече „неприфатливо“.
Двајца либански војници беа убиени, а двајца мировници на ОН беа ранети во израелските напади во петокот.
Либанската армија соопшти дека израелските сили нападнале една од нивните пунктови во селото Кафра во јужен Либан, при што загинале двајца војници и раниле уште тројца.
Наџиб Микати, привремениот либански премиер, го осуди нападот, нарекувајќи го „злосторство против Либан“.
Израелската армија се уште не ги коментираше инцидентите.
Слабата либанска армија не е деклариран непријател на Израел, а либанските државни сили се сметаат за немоќни против огромното влијание на Хезболах на југот на земјата.
Претходно, мировната мисија на ОН соопшти дека нејзиниот штаб во Накура бил повторно погоден, при што биле повредени уште двајца припадници на силите.
Ова е втор напад врз објектите на привремените сили на Обединетите нации во Либан (УНИФИЛ) за 48 часа. Во четвртокот двајца војници беа повредени откако израелски тенк пукаше кон стражарско место.
УНИФИЛ соопшти дека две експлозии се случиле во близина на набљудувачката станица во Накура во петокот. Силите соопштија дека еден од двајцата повредени мировници е пренесен во болница во блискиот Тир.
Израелските одбранбени сили (ИДФ) потврдија дека нивните војници отвориле оган, велејќи дека одговараат на „непосредна закана против нив“.
ИДФ соопшти дека првичната истрага открила дека позицијата УНИФИЛ била погодена додека војниците се обидувале да погодат цел на 50 метри оддалеченост од мировниците.
Експлозиите се случиле кога неколку заштитни ѕидови на базата на ОН во близина на Лабунех, недалеку од либанско-израелската граница, исто така се урнале откако израелски воен булдожер ги погодил кога израелските тенкови се приближиле до пунктот.
