Утре истекува рокот за изградба на катната гаража на земјиште кое е откупено од државата пред повеќе од десет години - од компанијата се уште не излегуваат со став во јавност.
Истовремено, утре ќе се реализира средбата во Собранието за спорната градба, катната гаража која се наоѓа кај Собранието, Домот на Армијата и Управниот суд.
Според неофицијални информации на ТВ 24, на утрешната средба ќе присуствуваат претставници од Владата, министерството за внатрешни работи и транспорт, државниот правобранител, претставници од Општина Центар и од компанијата „Анго“.
Минатата недела, премиерот Христијан Мицкоски, официјално најави дека ќе се прецизира што понатаму со спорната градба, изјави дека македонското Собрание е небезбедно со изградба на ваков објект, но истовремено треба да се води сметка и компанијата инвеститор да не биде во загуба, затоа што некој претходно се однесувал незрело. Затоа на утрешниот состанок, ќе се бара начин за да нема оштетена страна, но се уште е непознато дали државата ќе го откупи земјиштето или ќе биде експропирано.
Општина Центар веќе се изјасни дека во оваа фаза тие не можат ништо да направат, откако општината во 2021 година го изгубила спорот, очекуваат најавеното изнаоѓање решение од Владата и надлежните министерства да оди во правец кој нема да биде на штета на граѓаните на Општина Центар, на институцијата и на општинскиот буџет.
На 19 август годинава, почна изградбата на катната гаража зад Собранието, во центарот на Скопје.
Просторот кој со години се користеше како див паркинг меѓу Собранието и Домот на Армијата почна да се оградува и со градежни машини се расчистува просторот. Поставена е и табла со податоци за инвеститорот ДТПУ АНГО ДООЕЛ од Скопје и изведувачот.
Градежната дозвола за изградба на катната гаража беше поништена во 2018 година од екс - градоначалникот на Оштина Центар Саша Богдановиќ, бидејќи инвеститорот не почнал во предвидениот рок со градба.
Но, инвеститорот на ова решение поднесе жалба и по судската постапка која трае неколку години решението на Општина Центар се укинува и на инвеститорот му се дозволува да гради.
Државното земјиште кај Собранието беше продадено на јавно наддавање во 2013 во времето на премиерот Никола Груевски, а министер за транспорт и врски беше Миле Јанакиески, согласно договорот за отуѓување на катна гаража со компатибилни класи на намена односно изградба на мали комерцијални и деловни единици. Катноста на објектот согласно Детален урбанистички план е П+2, а влезот е предвиден од пристапната улица помеѓу Собрание и Дом на АРМ.
