Обилните снежни врнежи ги затворија патиштата во Јужна Африка.
Патниците се заглавени во своите автомобили по невообичаено обилните снежни врнежи во тој дел од континентот.
Во некои делови на Африка паднал снег и до два метри.
Особено погоден е автопатот Н3 што ги поврзува Јоханесбург и Дурбан, при што службите за итни случаи се обидуваат да стигнат до луѓето кои останале заробени во нивните возила во деловите каде што патот бил затворен.
Некои ја поминале ноќта во своите автомобили. Клучниот автопат на истокот на државата е еден од најтешко погодените, со затворени неколку делници и непроодни заобиколувања, рекоа властите.
„Сè уште нема детални информации за состојбата на дел од учесниците во сообраќајот кои ги зафати силен снег“, изјави управителката на Управата за наплата на патарините Таија Дугра.
Блокирани 13 часа „Итната помош работеше без престан во текот на ноќта. Тие се обидуваа да стигнат до што е можно повеќе учесници во сообраќајот“, вели Дугра.
Ќебиња и оброци се доставени до некои заглавени возачи, соопшти провинциската влада Квазулу-Натал.
Камионите се паркирани покрај патот од петокот, изјавил претставник на Корпорацијата за управување со патниот сообраќај Сајмон Свејн за АФП: „Автобусите што патуваат меѓу провинциите се заглавени на бензинските пумпи околу седум часа“.
Мухамед Гулам изјавил за Њузрум Африка дека ноќта ја поминал во автомобил со своите деца надвор од градот Харисмит, околу 270 километри југоисточно од Јоханесбург.
„Бевме блокирани повеќе од 13 часа, бевме без храна. Не би можеле да се спасиме без помошта на службата за итни случаи“, рече Гулам.
На одредени места снежната покривка е дебела и до два метри, соопштија од претпријатието за безбедност на патиштата „Ариве алајв“.
„Се очекува повеќе снег, а во повеќе делови од земјата има портокалови предупредувања. Ова е екстремен случај“, рекол прогнозерот на јужноафриканската метеоролошка служба Лутандо Масимини.
Далеку од подрачјата погодени од снег, овој редок феномен привлече голем број луѓе да патуваат за да го видат снегот.
Џастин Надасем Бејкер возел три часа од Јоханесбург со семејството до Варден.
„Возењето траеше три часа. Возбудени сме. „Поминаа многу, многу години откако последен пат видовме снег“, рече Бејкер.
