Четворица мажи се уапсени денеска поради сомнение дека извршиле тежок прекршок и влегле во имотот на премиерот Риши Сунак на северот на Англија, соопшти локалната полиција.
„Уапсивме четири лица на имотот на премиерот во неговата изборна единица. Полицајците уапсија четворица мажи во рок од една минута од неовластеното влегување во имотот на премиерот“, се вели во соопштението на полицијата, пренесува Ројтерс.
Групата Youth Demand објави видеа на Платформа X на кои се гледа како човек влегува во езеро на имот за да изврши нужда како чин на протест против владата на Риши Сунак.
Групата бара замрзнување на новите лиценци за нафта и гас и двојна забрана за извоз на оружје во Израел.
Потсетуваме дека Сунак неодамна се извини што предвреме ја напуштил комеморацијата на Денот Д во Нормандија, признавајќи дека тоа било грешка.
Премиерот се соочи со критики за напуштање на комеморацијата, при што лабуристите го нарекоа потегот „напуштање на должноста“.
„80-годишнината од Денот Д беше длабок момент да им се оддаде почит на храбрите мажи и жени кои ги ставија своите животи на линија за да ги заштитат нашите вредности, нашата слобода и нашата демократија“, напиша Сунак на социјалната мрежа Х.
Тој напиша дека оваа годишнина треба да биде за оние кои ја дадоа крајната жртва за земјата.
- Последно што сакам е комеморациите да бидат во сенка на политиката. Длабоко се грижам за ветераните и ми беше чест да ја претставувам Велика Британија на голем број настани во Портсмут и Франција во изминатите два дена и да се сретнам со оние кои толку храбро се бореа. По завршувањето на настанот во Нормандија, се вратив во Обединетото Кралство. Кога ќе размислам, грешка беше што не останав подолго во Франција и се извинувам – заклучи Сунак на социјалната мрежа Х.
На церемонијата по повод 80-годишнината од почетокот на истоварувањето на сојузниците во Нормандија во Вер-сур-Мер во северозападна Франција присуствуваа околу 2.000 гости, меѓу кои американскиот претседател Џозеф Бајден, францускиот претседател Емануел Макрон, британскиот крал Чарлс III и британскиот премиер Риши Сунак.
Да потсетиме дека сојузничките истовари во Нормандија започнаа на 6 јуни 1944 година и на тој ден 156.000 сојузнички војници беа префрлени преку Ла Манш. Слетувањето во Нормандија беше еден од клучните моменти во Втората светска војна, бидејќи слетувањето го означи постепеното отворање на друг фронт против Германија.
