Трамп: ВОЈНАТА ВО УКРАИНА Е ЗАГЛАВЕНА, ЌЕ ЈА ПРЕКИНАМ

Републиканскиот претседателски кандидат Доналд Трамп изјави денеска дека САД треба да се повлечат од војната во Украина и дека демократската потпретседател Камала Харис и претседателот Џо Бајден немаат намера да го сторат тоа.

„Бајден и Камала не воведоа во војната во Украина и сега не можат да не извлечат“, рече Трамп во својот говор во државата Џорџија.

САД немаат војска во Украина, но обезбедија воена и хуманитарна помош вредна милијарди долари.

„Мислам дека сме заглавени во таа војна, освен ако не станам претседател. Ќе ја прекинам. Ќе преговарам и ќе излеземе. Мораме да излеземе. Бајден вели „ние нема да си одиме додека не победиме““ рече Трамп.

Трамп, го обвини Володимир Зеленски дека „одби да склучи договор“ за ставање крај на војната во Украина. Ова е најексплицитната критика на Трамп кон украинскиот претседател и начинот на кој тој ја води војната досега.

„Верувам дека најлошиот договор би бил подобар од ситуацијата во која сега се наоѓа Украина. „Сè што имаат е уништена земја која изгуби една петтина од својата територија и десетици илјади луѓе“, рече Трамп.

Ова повеќе не е Украина. Никогаш нема да можете да ги обновите овие градови и населби, и никогаш нема да можете да ги вратите мртвите луѓе, толку многу мртви. Тие градови ги нема, а ние продолжуваме да му даваме милијарди долари на човекот кој одби да се договори, Зеленски. Не постои договор што не би бил подобар од ситуацијата што ја имате во моментов. Имате земја која е збришана, таа не може да се обнови“, рече Трамп за време на предизборниот митинг во Минт Хил, Северна Каролина.

Овој настап доаѓа во време кога на Капитол Хил расте незадоволството на републиканците од Зеленски. Во Претставничкиот дом, републиканците се обидуваат да истражат какви средства од американските даночни обврзници отишле за поддршка на безбедноста на украинскиот претседател додека тој патувал во Пенсилванија, пренесува Си-Ен-Ен.

На собранието на ОН, Володимир Зеленски ги предупреди светските лидери „дека Русите ќе ги интензивираат нападите врз украинската енергетска инфраструктура, вклучително и нуклеарните централи“.

Во исто време, републиканските конгресмени го предупредуваат Зеленски да се држи настрана од американската внатрешна политика по неговата изјава кога го нарече потпретседателскиот кандидат на Трамп Венс „премногу радикален“.

Претходно оваа недела, Трамп го нарече Зеленски одличен бизнисмен.

„Секогаш кога доаѓаше во нашата земја заминуваше со 60 милијарди долари. Тој е веројатно најдобриот бизнисмен на светот“, рече Трамп.