ЕУ денеска го отфрли како „непромислен и неодговорен“ планот на претседателот Владимир Путин да одобри нуклеарен одговор на потенцијалниот напад врз Русија, јавува агенцијата Франс прес (Франс прес).
Потсетуваме, вчера Путин најави промени во нуклеарната доктрина, што ќе дозволи употреба на нуклеарно оружје против ненуклеарни држави кога тие се поддржани од нуклеарните сили - што е јасна референца за Украина и нејзините западни сојузници.
„Путин се коцка со својот нуклеарен арсенал, и тоа не за прв пат. Ние, се разбира, силно ги отфрламе овие закани“, изјави за новинарите портпаролот на ЕУ за надворешна политика, Петер Стано.
Предложеното менување на руските нуклеарни правила, кои Путин има моќ да ги одобри, доаѓа додека Украина бара дозвола од западните сојузници да користи оружје со долг дострел за да нападне цели длабоко во Русија.
Киев вели дека е неопходно да се гаѓаат руските аеродроми и воената инфраструктура што ги користи Кремљ за напад на Украина. САД и другите западни земји се претпазливи да дадат таква дозвола.
Претходно денеска, портпаролот на Кремљ, Дмитриј Песков, рече дека планираните промени треба да се гледаат како „специфичен сигнал“ до Западот. Западните сили го обвинија Путин за опасно штракање со нуклеарно оружје за време на конфликтот во Украина. Лидерот на Кремљ упати неколку очигледни закани за подготвеноста на Москва да користи нуклеарно оружје.
„Ова е само продолжение на многу неодговорното и неприфатливо однесување на Путин. Ставот на Путин беше уште понепромислен, бидејќи доаѓа од шефот на постојана членка на Советот за безбедност на ОН“, рече Стано за последната закана, која дојде по голем број светски лидери присуствуваа на Генералното собрание на ОН во Њујорк.