Во саботата на шпанскиот остров Мајорка се одржа раскошна свадбена церемонија на Џина Шумахер и нејзиниот долгогодишен партнер Џаин Беке. Како што пренесуваат медиумите, двојката го кажала судбоносното „да“ во семејната вила на Шумахер, чија вредност се проценува на 30 милиони евра. Вилата, која се наоѓа на прекрасниот остров, некогаш била во сопственост на претседателот на Реал Мадрид, Флорентино Перез, пред да ја купи семејството Шумахер.
Како што објави Дејли мејл, гламурозниот настан бил под строги мерки за приватност - гостите морале да ги остават своите мобилни телефони. Целта на овие мерки била да се зачува интимноста на свадбата и да се зачува приватноста на семејството.
Сепак, најголемо внимание привлекоа гласините кои се појавија во германскиот медиум „Билд“, кои тврдат дека на венчавката присуствувал и самиот Михаел Шумахер. Неговото присуство на јавни настани привлекува големо внимание, бидејќи тој не се појавува во јавноста поради неговото здравје по тешката несреќа на скијање во 2013 година.
Иако информациите за неговото присуство не се потврдени, самиот настан предизвика голем интерес како во Германија, така и во светот.
- Дали Шуми навистина беше присутен на свадбата во саботата? Можно е. Дури и многу можно. Меѓутоа, тој не бил во градината, каде што имало други гости, од кои некои, без сомнение, не припаѓаат на најтесниот семеен круг, пренесува Билд.