Манчестер Сити не победи ниту на популарниот Боксинг деј денеска. На отворањето на денешната Премиер лига програма Сити на домашен терен ремизираше со Евертон, 1:1, факт кој што вели дека шампионот на Англија победил само еднаш во последните тринаесет меча.
Сепак, на изненадување на сите по мечот, менаџерот Пеп Гвардиола даде чудна и комична изјава дека неговиот тим одиграл брилијантно.
„Игравме навистина добро, но сме во период кога создаваме шанси, но примаме гол при првата можност на противникот. Но, продолжуваме понатаму. Настапот против овој тим беше добар и во офанзива. и во дефанзива Имавме многу удари од шеснаесетникот, но за жал, не успеавме да го постигнеме резултатот што го посакувавме. Резултатот не е добар, но изведбата беше брилијантна. Првото полувреме беше брилијантно. Многу добри беа и првите 10-15 минути од почетокот на вториот, до пеналот. Сега е време да се опоравиме и да одиме во Лестер во најдобра можна состојба“, изјави Гвардиола по натпреварот.
