Претседателката на Европската комисија, Урсула фон дер Лајен, испрати писмо до лидерите на земјите-членки на ЕУ во пресрет на самитот за миграцијата, каде што ја истакна важноста од депортирање на илегалните мигранти од ЕУ.
Во писмото, кое дојде откако Италија отвори два прифатни центри за мигранти во Албанија, Фон дер Лајен ги пофали „земјите од ЕУ кои ја разбраа важноста за решавање на овој проблем“, без директно да се повика на Мелони.
Фон дер Лајен, исто така, истакна дека во моментов само 20 отсто од мигрантите кои немаат право да останат на територијата на ЕУ се депортирани, што „не е доволно“ за овој блок.
Таа изјави и дека овие лица најчесто одат во други земји од ЕУ и дека не се спроведуваат одлуките за нивниот статус, со што се прекршува законот.
Со ова писмо Фон дер Лајен посочи дека, барем во контекст на мигрантската политика, ќе го води својот втор мандат во согласност со идеите на десничарските политички опции, а аналитичарите сметаат дека тоа е дел од обидите на конзервативните партии да ги врати гласовите на екстремно десничарските партии.
