Украинската влада објави видео за кое тврди дека ги прикажува севернокорејските војници во Русија, <a href="https://www.index.hr/vijesti/clanak/ukrajinci-objavili-snimku-ovo-su-sjevernokorejski-vojnici-u-rusiji/2608102.aspx?index_tid=581136&index_ref=naslovnica_vijesti_prva_d">пренесува</a> Индекс. Видеото го објави Украинскиот центар за стратешки комуникации, кој работи во рамките на украинското Министерство за култура и информации.
Видеото објавено на официјалниот Телеграм канал на Центарот, според Украина, покажува дека севернокорејските војници преземаат воени униформи и опрема во воена база на далечниот исток на Русија. Според Центарот, видеото е креирано во тренинг центарот Сергеевски.
Украински извори, да потсетиме, со денови тврдат дека севернокорејски војници се испратени во Русија да учествуваат во војната против Украина.
<b>„Испратeни се повеќе од 10.000 војници“</b>
Повеќе од 10.000 севернокорејски војници се обучуваат за војна против Украина на територијата на Русија, според разузнавачки извори од Украина и Јужна Кореја.
Како што изјави Кирило Буданов, шеф на воената разузнавачка служба на Украина во интервју за веб-страницата The War Zone, околу 11.000 припадници на пешадиските единици на севернокорејската армија во моментов се на обука за војна на истокот на Русија. Очекува да бидат готови до 1 ноември, односно за неполни две недели.
Буданов додаде дека севернокорејските сили треба да користат руска опрема и муниција во борбите. Тој очекува првата единица, околу 2.600 војници, да биде распоредена во областа Курск, која беше нападната од елитни украински војници пред повеќе од два месеци.