„Вашингтон побара од израелската влада повеќе информации и истрага за инцидентот“, изјави портпаролката на американскиот претседател Џо Бајден, Карин Жан-Пјер.
„Жалиме за оваа трагична загуба“, изјави американскиот државен секретар Ентони Блинкен. „Најважно е да се соберат фактите“, рече тој, додавајќи дека акциите и заклучоците ќе бидат „водени од факти“.
Палестинските власти ја опишаа како 26-годишна активистка од Сиетл, која имала и американско и турско државјанство.
Претходно, палестинската новинска агенција ВАФА објави дека израелските војници застрелале американска државјанка додека таа протестирала против проширувањето на израелските населби на северот на Западниот Брег.
Жената починала откако била пренесена во болница со тешки повреди на главата, се вели во извештајот. ВАФА соопшти дека активистката со турско потекло учествувала на неделен протест против проширувањето на израелските населби во градот Беита, јужно од градот Наблус, кога израелските војници отвориле оган.
Војската соопшти дека го истражува извештајот по „насилната активност“ во областа.
Израелските сили пукале врз лицето кое во голема мера го поттикнало протестот, соопшти армијата. Лицето фрлало камења и им се заканувало на израелските безбедносни сили, се вели во соопштението на армијата. На почетокот не било јасно дали убиеното лице е американски државјанин.
Турското Министерство за надворешни работи го осуди „убиството извршено од владата на Нетанјаху“. „Израелските власти кои ќе извршат злосторства против човештвото и сите оние кои безусловно ги поддржуваат ќе одговараат пред меѓународните судови“, објави Министерството.
Тензиите се зголемија на окупираниот од Израел Западниот Брег поради воената кампања на Израел во Појасот Газа.
