Судот во Перу го осуди поранешниот претседател Алехандро Толедо (78) на 20 години и шест месеци затвор за корупција и перење пари.
Обвинителите велат дека тој зел 35 милиони долари мито од бразилска градежна компанија која добила договор за изградба на пат во јужен Перу.
Толедо беше на функцијата помеѓу 2001 и 2006 година.
Уапсен е пред пет години во Калифорнија, каде што живееше и работеше со години, а минатата година беше екстрадиран во Перу. Тој првично беше држен во самица во окружниот затвор источно од Сан Франциско, но беше пуштен во домашен притвор во 2020 година поради пандемијата на корона вирус и влошеното ментално здравје.
Бразилската компанија Одебрехт, која оттогаш го смени своето име во Новонор, призна дека плаќала милиони долари мито на службеници ширум Латинска Америка и САД за да обезбеди владини договори.
Судијата Инес Рохас рече дека Перуанците му верувале на Толедо како свој претседател, „задолжен за управување со јавните финансии“ и одговорен за „заштита и обезбедување на правилна“ употреба на ресурсите.
Таа додаде дека Толедо „имал должност да дејствува со апсолутна неутралност, да го штити и зачува имотот на државата, избегнувајќи нејзина злоупотреба или експлоатација“, но тој не го сторил тоа.
Наместо тоа, како што ја цитираше Асошиејтед прес, тој ја „измамил земјата“.
Во Перу, властите го обвинија Толедо и уште тројца поранешни претседатели дека примале исплати од градежниот гигант. Тие тврдеа дека Толедо добил 35 милиони долари од „Одебрехт“ во замена за договор за изградба на автопат долг 650 километри што го поврзува Бразил со јужниот дел на Перу. Тој дел од автопатот првично се проценуваше дека чини 507 милиони долари, но Перу на крајот плати 1,25 милијарди долари.
Толедо ги негираше обвинувањата.
Во 2019 година, друг поранешен перуански претседател, Алан Гарсија, се застрела кога полицијата пристигна во неговиот дом за да го уапси под обвинение за поткуп во врска со „Одебрехт“.
Двајца други поранешни перуански претседатели, Педро Пабло Кучински и Оланта Хумала, исто така се под истрага во случајот Одебрехт.