Тошковски: Има информации за обид за дестабилизација, МВР Е СПРЕМНО И ЌЕ СЕ СПРАВИ СО ПРЕДИЗВИЦИТЕ

МВР покажа дека може да се справи со сите предизвици во рамки на своите надлежности и успешно ќе се справи со евентуални протести или немири кои би можеле да се случат во престојниот период, рече денеска министерот за внатрешни работи, Панче Тошковски. Запрашан дали МВР очекува немири оваа есен по најавеното изјаснување на Уставниот суд дека ќе ја разгледува уставноста на законот за употреба на јазиците и реакциите на несогласување од страна на албанскиот политички блок, Тошковски вели:

„МВР ќе одговори на секој предизвик којшто ќе се постави пред него, во рамки на негови надлежности. Покажавме до сега дека можеме да се соочиме со сите предизвици и да ги решиме соодветно. Така ќе биде и во иднина. Дали има најави за немири оваа есен, од аспект на протести – да, имаше изминатиот период такви информации. Дали ќе се справиме со нив – да!“, рече Тошковски.

„Има информации за дестабилизација на безбедносната состојба во државата, но МВР е подготвена да се справи со предизвиците“, вели министерот за внатрешни работи Панче Тошковски, тврдејќи дека сè уште нема толкава загриженост за да се свика Советот за безбедност.

Министерот информираше и дека издавањето на лични документи е вратено во нормала.

„Од оваа недела натаму секој граѓанин кој што ќе поднесе барање за да се стекне со нова патна исправа, возачка дозвола, лична карта, ќе може да ги оствари во рамки на законското право во рок од 15 дена“, посочи тој.

На прашањето дали ќе се зголемат капацитетите од аспект на машини за изработка доколку во иднина настане слична ситуација, тој одговори дека работат на трајно решавање на проблемот.

„За разлика од тие претходно, ние решаваме проблеми и гледаме колку што е можно да ја поедноставиме целата постапка, не само во однос на лични документи, туку во однос на секое право кое што има да го стекне македонскиот граѓанин. Во иднина ќе се фокусираме на развластување од аспект на дискрециони права, сето она што го говориме за дигитализација во рамки на работењето на МВР ќе биде насочено исклучиво во таа насока“, рече Тошковски.