Иако е нова институција, Министерството за државна администрација има една од најодговорните задачи во владата: ставање во функција на државната машинерија, што во суштина е државната администрација.
Пробллемите и задачите им се темелни, од подигање на стручноста и стандардите, до наоѓање вистинско работно место за стотици партиски вработени, до обезбедување ниво на работа кое може успешно да соработува и со домашните задачи но, и со меѓународните институции со кои соработува владата.
“Мора да се стави крај на партиските и етничките вработувања и на непотизмот во јавната администрација, а за тоа се потребни суштински и сеопфатни реформи кои ќе обезбедат ефективна админитрација“ порача министерот Горан Минчев од регионалната конференција „Иновативен менаџмент на човечки ресурси за јавната администрација“ која се одржува во Љубљана.
За таа цел, добивање искуства од државите каде нивната администрација успешно функционира министерот за државна администрација Горан Минчев ја посети Словенија. Помеѓу останатото, оствари средба и обраќање, за време на посетата во Словенија, со македонските студенти кои се потенцијал за квалитетен кадар по нивното дипломирање и пожелно враќање во Македонија.
На покана на Претседателот на управниот одбор на државниот Факултет за информатички студии во Ново Место, Словенија, проф. д-р Борут Рончевиќ, министерот за јавна администрација, Горан Минчев, одржа предавање каде ја истакна клучната улога на образованието, иновациите и меѓународната соработка во поттикнувањето на општествениот напредок во регионот.
Обраќајќи се пред професорите и студентите, министерот Минчев ја поздрави програмата на Факултетот „Информатика во современото општество“ како водечки пример за подготовка на студентите за предизвиците на современиот свет.
Во своето обраќање, министерот Минчев се осврна и на тековните реформи и напорите за модернизација во јавната администрација во Република Македонија.
„Нашата цел е да го промовираме владеењето на правото, да ја намалиме корупцијата и да ја обновиме довербата на граѓаните во институциите, преку колективни, транспарентни и системски реформи.
Министерот Минчев ја искористи можноста да им се обрати и на македонските студенти кои студираат на Факултетот, повикувајќи ги да се вратат во својата татковина и да бидат идни лидери на промените и реформите.
„Вие сте амбасадори на промените, архитекти на напредокот и идни лидери кои сакаме да ни помогнат да го обликуваме патот на нашата држава.
На Македонија и требате.
Затоа што Македонија не е само место на мапата, таа е наш идентитет, наше наследство и наша колективна одговорност.
Очекувам дека по завршување на Вашето студирање, по завршување на Вашиот образовен пат надвор од татковината, стекнатите знаења и вештини ќе ги искористите на вистинското место, дома, и ќе придонесете кон развојот на Република Македонија.
Македонија Ве чека.
Вашата приказна не завршува кога ќе дипломирате, таа започнува кога ќе се вратите таму каде што припаѓа Вашето срце, во Вашата родна земја“ - заклучи Минчев.
Посетата на Словенија е само еден чекор во долгиот пат за министерот Минчев кој освен организација на самото ново министерство паралелно има задача за дополнителна обука на сегашната државна администрација, мапирање на тесните грла и застојот во процесите и носење решенија за тој проблем, како и борбата против корупција која министерствата ја водат во синергија.
