Латас до Беџети од ДУИ: Јас се чувствувам Македонец, ќе бидам во одбрана на Македонија во конфликт, ДАЛИ ВИЕ ЌЕ БИДЕТЕ?

Блерим Беџети, пратеникот од ДУИ, не сака да одговори дали ќе застане во одбрана на Македонија доколку постои можен конфликт со некоја од соседните држави, иако е пратеник на оваа држава и претставник на нејзините граѓани. Беџети одби да одговори на вакво прашање во „Само вистина“ на Канал 5, поставено од новинарот Драган Павловиќ Латас, кој посочи дека се чувствува како Македонец и би ја бранел Македонија.

- Двајцата сме граѓани на Македонија, вие имате албанско презиме, јас имам српско, двајцата сме граѓани на Македонија. Јас сум Македонец, така се чувствувам и било која од околните земји да создаде конфликт со Македонија, воен или друг јас ќе бидам во редовите на македонската војска или организација која ќе се брани, дали е Косово, Србија, Бугарија, Грција, Албанија кој било, дали вие може да кажете за себе? – беше прашањето кое го постави Латас.

Беџети одби да одговори на прашањето.

Во однос на Законот за бранителите, зошто не треба да бидат вклучени и припадниците на УЧК, Латас истакна дека зборуваме за бранители кои ги бранеле институциите на државата и неформална група која од страна на меѓународната заедница на почетокот беше именувана како терористичка група.

-  Истата група и Мендух Тачи ја нарече терористичка. Што значи не може да се изедначат.  Се вели претставници на институциите, од друга страна тие немаат институција која може да се легитимира. Луѓе во рамки на извршување на работни дејства изгубиле живот, а во која институција биле УЧК? УЧК не е институција, дури и Рамковниот договор не е потпишан од УЧК. Нигде не пишува УЧК, но пишува Македонија како држава, претседател, министри, рече Латас.

Воедно во однос на тоа дека ДУИ одбива да признае пораз на изборите и постојано повторува дека мора да се на власт како легитимни претставници на Албанците, Латас посочи дека ДУИ во коалицијата има партии од другите заедници, и не знаат колку гласови од Албанците добиле

- Ја претставувате коалицијата на ДУИ која се претставува како европска,  а не е членка на ниедна европска организација како што се ВМРО-ДПМНЕ или СДСМ, изјави Латас.