Ситуацијата со Артан Груби и пораката од Стејт департментот, јас неколку пати кажав во јавноста дека е силна порака, дека никој нема да биде поштеден од законот и дека секој треба да одговара за она што се огрешил. Но, ме зачудува фактот што СДСМ беше 7 години во коалиција токму со ДУИ и вицепремиер беше Артан Груби и цело време додека ние критикувавме и баравме одговори за одредени криминали и тендери во четири очи, огромни суми украдени и така натаму, од СДСМ молчеа, вели Жаклина Пешевска, пратеничката од ВМРО-ДПМНЕ во изјава за ТВ Канал 5.
Според неа, СДСМ молчеле затоа што немале доволен коалициски капацитет и влада која се одржувала на стаклени нозе, па во името на коалицијата претходно, во изминатиот период се воздржувале, а сега одеднаш ги отвораат очите и почнуваат да зборуваат.
– Тој синдром јас им го забележaв во Собрание, мислам дека малку, простете на израз, забораваат како се однесуваат, да не речам ги фаќа амнезија, забораваат како се однесуваа кога беа министри, самобендисано, ноншалантно, а сега целосно се сменија. И видете во овој криминал соучесници се токму членови од вашата партија и се надевам дека правдата ќе ги стигне – рече Пешевска обраќајќи се до нејзината соговорничка и пратеничка од СДСМ, Јованка Тренчевска.
Пешевска, како што рече, жали што СДСМ се ставени во позиција да бранат нешто што не се брани и додека некој наполнил џебови и вреќи со пари, СДСМ сега треба да го штитат.
Таа смета дека оградувањето на ДУИ од Артан Груби е само уште еден показател дека никој околу себе не сака да има човек од криминална природа или „гнило дрво” и со тоа си ја штитат партијата.
– Каде беа претходно кога цело време укажувавме, видете сега, после година дена играње фудбал во канцелариите на владата, сега се освестил Бујар Османи да каже дека тоа видео не требало да излезе. Прво, не требало така да се однесуваат во државните институции и каде бевте госпоѓо Тренчевска вие тогаш да реагирате, кога ние зборувавме, кога се поларизираше јавноста и која е фактурата што вие не ја спречивте и криминалите и еден куп пари што се однесоа од државната каса кога вие бевте во коалиција со ДУИ? праша Пешевска.
