Можете да ја сакате или не, да ви се допаѓа како пее или не, да ви е тамам или премногу... се' е тоа прашање на вкус, (а нели за вкусовите не се дискутира), ама никако не можете да и оспорите дека жената е царица.
Таа доминира на сцената, гази, знае што прави..., а прави многу повеќе од двојно помлади колешки и колеги кои излегуваат на бина со микрофонот во рака и стојат како во онаа играта „здрвен дедо“.
Карлеуша нуди перформанс - комплетен и за очи и за уши. Се' изгледа светски, скоцкано до најситен детаљ.
На синоќешниот концерт Јелена пееше се - и старо и ново. Песните беа поделени во неколку блока, во кои ја видовме и во неколку различни изданија. Слегуваше од сцената за да се смени сценорафијата и да се преслече, но имаше мајсторски спакувани промени и на самата сцена.
Кога е репертоарот во прашање, вечерта ја почна со песните од последниот студиски материјал, за во склоп на околу едно и полчасовниот настап да ги отпее и своите најголеми хитови. И секако, најголемо изненадување за присутните беше изведбата на „Бисер балкански“ кога зеде македонско знаме и дури и го бакна.
И на крајот уште еднаш, како пее, како звучи, како се однесува се' е тоа нејзино право и личен избор - ама жената си ја знае работата и затоа е таму каде што е - на врвот!
Фото: Вечер.мк