Изминатата 2024 година беше најтоплата забележана досега, со во просек околу 40 топли денови повеќе од вообичаено ширум светот, открија група научници. Тие ја гледаат причината за тоа во климатските промени.
Анализата на истражувачите од „World Weather Attribution“ и „Climate Central“ на крајот на годината, исто така, покажува дека имало поекстремни временски настани во кои загинале најмалку 3.700 луѓе, а милиони се раселени.
Научниците открија дека од 29 вакви настани, 26 имаат јасни врски со климатските промени.
„Наодот е поразителен, но не и изненадувачки: климатските промени одиграа улога, често главна улога, во повеќето настани што ги проучувавме. Тоа ги направи екстремните горештини, сушите, тропските циклони и обилните врнежи ширум светот поверојатни и поинтензивни , уништувајќи животи и средства за живот на милиони луѓе“, изјави за новинарите научникот Фридерике Ото, која учествуваше во гореспоменатата анализа.
Таа додаде дека се додека светот согорува фосилни горива, ситуацијата само ќе се влошува.
Во текот на годината, екстремно високи температури ја зафатија северна Калифорнија, Мексико и Централна Америка, западна Африка и јужна Европа.
Во земјите од Јужна и Југоисточна Азија училиштата биваа затворени.
Неколку пати е забележано дека температурата ги надминува претходно измерените нивоа. Исто така, беше оценето како најжешкото лето досега.
За да ја направат својата анализа, тим од меѓународни доброволни научници ги спореди дневните температури ширум светот во 2024 година со температури што би се очекувале во свет без климатски промени.
Резултатите сè уште не се рецензирани, но истражувачите користеле рецензирани методи.
Во некои области се забележани 150 или повеќе екстремно топли денови по ред поради климатските промени.
Научничката Кристина Дал наведува дека најранливи се најсиромашните и најнеразвиените земји на планетата.
„Луѓето не мора да умираат во топлотни бранови. Но, ако не можеме убедливо да кажеме дека многу луѓе всушност умираат, многу е потешко да се подигне свеста. Топлотните бранови се убедливо најсмртоносниот екстремен временски настан, и тоа е местото каде што климатските промени навистина играат голема улога“, изјавила Ото.
Оваа година, научниците предупредија дека планетата опасно се приближува до границата за затоплување од 1,5 степени Целзиусови според Парискиот договор во споредба со прединдустрискиот просек.
Се очекува Земјата наскоро да го премине тој праг, иако се смета дека не е надминат додека тоа затоплување не се одржи со децении.
