Поранешниот извршен директор на Пелотон откри дека „ги
изгубил сите пари“ и дека е принуден да ги продаде своите работи. Додека
Американците беа затворени во своите домови за време на пандемијата,
велосипедите Пелотон станаа многу барана луксузна стока.
Продажбата се зголеми за 250 проценти во првиот квартал од
2020 година, а акциите на компанијата се зголемија за 400 проценти во текот на
истата година.
Сепак, со олеснување на рестриктивните мерки, Пелотон падна
во немилост, бришејќи голем дел од богатството на својот основач во процесот.
Дополнителен пад на вредноста на акциите на компанијата
уследи по епизодата од продолжението на серијата „Сексот и градот“ во која еден
од главните ликови доживеа срцев удар по тренинг на велосипедот на Пелотон.
- Ги изгубив сите пари. Морав да продадам речиси сè во мојот
живот - изјави за New York Post Џон Фоли, кој го основа Пелотон во 2012 година.
Фоли вредеше 1,9 милијарди долари на врвот на Пелотон, но
неговото лично богатство падна на 225 милиони долари кога се повлече од
функцијата извршен директор во февруари 2022 година, според Блумберг.
- Знаете, во еден момент имав многу пари на хартија. За жал,
не и во банка - се пожали бизнисменот.
Статусот милијардер на Фоли преку ноќ исчезна до ноември
2021 година, но работите тргнаа на полошо непосредно пред Божиќ истата година.
- Навистина мислевме дека правиме нешто посебно за светот.
Навистина се грижевме за нашите членови. Се грижевме за нашите акционери, се
грижевме за нашите вработени. И одеднаш, само ни се исмејуваа... се се
распаѓаше“, изјави Фоли.
Пелотон отпушти уште 400 вработени на почетокот на летото и
продолжи да ги затвора своите продавници во обид да ги намали трошоците, објави
Дејли мејл.
