Земјите од Европската унија денеска не се спротивставија на воведувањето повисоки тарифи за електричните возила (ЕВ) произведени во Кина, што значи дека Европската комисија сега има можност да одлучи за понатамошните чекори.
Десет земји гласаа „за“, а пет „против“, додека 12 беа воздржани, изјавија за бриселскиот портал „Политико“ неколку дипломати запознаени со резултатите од гласањето во Европскиот комитет за инструменти за трговска одбрана.
Формално кажано, експертите ниту се согласија за воведување нови царини, ниту гласаа против нив, што значи дека Комитетот не дал „никакво мислење“ за плановите на Европската комисија, изјавија пет дипломати кои сакаа да останат анонимни.
Германија, Унгарија, Словачка, Словенија и Малта гласаа против зголемувањето на царините за кинеските електрични автомобили.
Европската комисија ќе го објави законскиот текст за тарифите за кинеските ЕВ пред 30 октомври, кога законски е обврзан да ја заврши истрагата, а тие ќе стапат на сила следниот ден, изјави анонимен извор за Политико.
Овој рок сепак остава доволно време да се утврдат гарантираните минимални цени за кинеските електрични возила што би го неутрализирале влијанието на наводните државни субвенции на Пекинг, додава бриселскиот портал.
