Состанок на главните преговарачи на Белград и Приштина ќе се одржи на 19 март во Брисел, најави портпаролот на Европската комисија Петер Стано, додека продолжуваат дипломатските напори двете страни да постигнат напредок во нормализацијата на меѓусебните односи по одлуката на Косово за укинување на српските динари во платежните трансакции.
На денешниот брифинг со новинарите, Стано рече дека специјалниот пратеник на Европската унија за дијалог меѓу Белград и Приштина, Мирослав Лајчак, ги поканил главните преговарачи во Брисел да продолжат со дискусиите за одлуката на Централната банка на Косово (ЦБК) да ја забрани употребата на динари во финансиски трансакции и трговија.
Американскиот претставник за Западен Балкан, Габриел Ескобар, денеска изјави за Радио Слободна Европа (РСЕ) дека не го обврзал косовскиот премиер Албин Курти да го суспендира указот за забрана на динарот.
Ескобар рече дека САД и ЕУ работат на долгорочно решение кое ќе вклучува електронски трансфер во евра преку финансискиот систем на Косово, нагласувајќи дека „потребно е решение“.
„Затоа побарав од премиерот да ја суспендира одлуката додека ние заедно со ЕУ, односно со САД и со Косово работиме на долгорочно решение. Тоа подразбира електронски трансфери во евра преку косовскиот систем. Сега мораме нешто итно да направиме. За жал, не успеав да го наговорам Курти на тоа“, изјави американскиот дипломат за РСЕ.
Од кабинетот на српскиот претседател Александар Вучиќ соопштија дека тој вечерва ќе се сретне со специјалниот претставник на ЕУ за дијалог меѓу Белград и Приштина, Мирослав Лајчак.
Лајчак минатата недела беше во Приштина, а потоа и американскиот дипломат Габриел Ескобар. Курти во средината на февруари изјави дека косовската влада нема да се меша во одлуката на ЦБК за укинување на употребата на динарот во платните трансакции и дека одлуката нема да биде поништена, туку ќе биде одреден рок за усогласување.
На Косово од 1 февруари стапи на сила регулативата на ЦБК која предвидува плаќање во готовина и плаќање исклучиво во евра, што ја зголеми загриженоста на српската заедница во Косово, бидејќи десетици илјади Срби добиваат плати, пензии и социјални надоместоци во динари кои ги користат и за пазарење и продажба.
Европската унија изрази загриженост за последиците што оваа одлука може да ги има врз секојдневниот живот на косовските Срби, а меѓународната заедница претходно побара Косово да го одложи спроведувањето на декретот, укажувајќи на можното негативно влијание врз косовските Срби.
Србија од својот буџет плаќа 60.946 плати и пензии на Косово, 2.430 студентски стипендии и финансира народни кујни за околу 2.000 социјално најзагрозени граѓани, а ставот на Белград е дека забраната за плаќање динари и укинувањето на динарот како платежно средство директно лишува огромен број жители од основни средства за живот“.
Косово, од друга страна, инсистира на транспарентност во монетарните трансакции и тврди дека Србија злоупотребува пари во име на косовските Срби.
„Претседателот на Србија изјавува дека секоја година испраќа 800 милиони евра на Косово. Ако на Косово дојдоа 800 милиони евра, Србите од Косово би имале исти приходи како и граѓаните на Јапонија“, изјави претходно косовскиот преговарач Бесник Бислими, тврдејќи дека тоа „ на Косово од Србија доаѓаат помалку од 200 милиони евра“.
„Вучиќ со воспоставување на транспарентност ќе треба да објасни каде одат другите пари“, рече Бислими.
