Сите ирански конзулати во Германија ќе бидат затворени откако Техеран погуби германско-ирански државјанин, соопшти денеска германската министерка за надворешни работи Аналена Баербок.
Џамшид Шармахд, опозициски активист, беше осуден на смрт од режимот во Техеран во 2020 година под обвинение за тероризам. Тој беше егзекутиран во понеделникот.
„Во неколку наврати јасно му ставивме до знаење на Иран дека егзекуцијата на германски државјанин ќе има сериозни последици. Затоа, решив да затворам три ирански конзулати во Франкфурт на Мајна, Минхен и Хамбург“, изјави Баербок за новинарите.
<b>Амбасадата останува отворена</b>
Неименуван претставник на Министерството за надворешни работи во Берлин рече дека затворањето на конзулатот ќе влијае на 32 вработени. Тој додаде дека последен пат Германија презела такви „драстични, но соодветни“ мерки по руската инвазија на Украина.
Сепак, иранската амбасада во Берлин ќе остане отворена, како и германската амбасада во Техеран. Според претставник на Министерството за надворешни работи, Берлин не сака целосно да ги прекине дипломатските врски.
Баербок претходно нагласи дека дипломатските односи на Германија со Иран се на историски ниско ниво и ги повика членките на Европската унија да направат повеќе. „Јас сум за тоа Брисел да ја стави Иранската револуционерна гарда на списокот на терористи“, рече таа.
