Поранешниот претседател на Албанија и лидер на Партијата на слободата, Иљир Мета, денеска е уапсен во Тирана по налог на Специјалното обвинителство за корупција и организиран криминал (СПАК).
Уапсен е на влезот во Тирана додека се движел кон местото каде што требало да одржи прес-конференција, а според информациите, најверојатно е уапсен поради случајот со кој бил поврзан за корупција и одбивање да пријави имот, пренесува Еуроњуз Албанија.
Адвокатот на Мета се повика на снимката прикажана од локалните медиуми на која се гледа како маскираната полиција запира црн автомобил и го изнесува Мета, кој делува како да дава отпор.
Оваа вест ја потврди и поранешниот премиер Саљи Бериша, кој рече дека станува збор за политичко апсење.
„Политичкиот прогон на Иљир Мета е политички, политички и само политички. Тие не објавија никакви факти, ниту еден документ, туку ги извршија наредбите на Еди Рама, кој со сите средства се обиде да го елиминира Иљир Мета политички, а можеби и физички, како што јас го осудив во минатото, беше вклучен во исчезнувањето на лица на незаконски, неуставен начин“, рече Бериша.
Иљир Мета претходно неколкупати беше повикан во Обвинителството од СПАК, поради случајот ЧЕЗ ДИА, кој се однесува на имотна истрага и лобирање.
Мета најави дека денеска во 13 часот и 40 минути ќе одржи прес-конференција, но пред тоа е уапсен, пишува Албанската пошта.
Претходно австрискиот весник Кронен Цајтунг објави дека Иљир Мета и ЛСИ (сега Партија на слободата) платиле 700.000 долари за лобирање во Соединетите Американски Држави.
Таканаречениот случај ЧЕЗ ДИА потекнува од 2009 година, а девет приватни фирми добиле 12 милиони долари од ЧЕЗ од договорот за наплата на неплатени долгови.
Најголем дел од средствата доби „Дебт Интернационал Менаџмент“ со администратор Кастриот Исмаиљи.
