Човек кој доживеал срцев застој и кај него била прогласена мозочна смрт, се разбудил додека хирурзите биле среде процесот на земање на неговите органи за донација, изјавило неговото семејство за медиумите.
Случајот на Ентони Томас Т.Џ. Хувер II е под истрага од државните и федералните владини претставници, објавија во четвртокот на Националното јавно радио од Кентаки и новинската станица ВКИТ.
Сестрата на Хувер, Дона, раскажала како Хувер бил однесен во Баптистичката здравствена болница во Ричмонд, Кентаки, во октомври 2021 година поради предозирање со дрога. Лекарите набрзо им кажале дека на Хувер му недостасуваат рефлекси или мозочна активност и на крајот решиле да го симнат од апаратите за одржување во живот.
Во тоа време, болничкиот персонал наводно му кажал на семејството дека Хувер дал дозвола неговите органи да бидат донирани во случај на неговата смрт. За да ги почитува неговите желби, болницата тестирала кој од неговите органи би можел да се донираат, а установата дури и одржала церемонија во негова чест.
Дона рекла дека забележала како очите на Хувер се отвораат, но и рекле дека тоа е само рефлекс и нормална работа.
Околу еден час откако Хувер бил доведен на операција за да му ги отстранат органите, лекарот излегол и објаснил дека Хувер „не бил подготвен“.
„Се разбудил“, рекла неговата сестра.
Таа се присетила дека и било наложено да го донесе својот брат дома и да му биде удобно, иако тој веројатно нема да живее уште долго. Како што изјавила за ВКИТ, таа се грижи за него во последните три години бидејќи се бори со проблеми со одењето, меморијата и зборувањето.
ВКИТ објави дека неговата сестра ги дознала целосните детали за операцијата на нејзиниот брат дури во јануари, кога поранешен работник стапил во контакт со неа пред да испрати писмо до конгресната комисија која одржала сослушување во септември за испитување на организациите за набавка на органи.
Авторката на писмото рекла дека видела како Хувер почнал да удира по операционата маса и видно да плаче.
Од болницата изјавиле дека безбедноста на пациентите им е „највисок приоритет“. Тие, исто така, навеле дека случајот на Хувер „не бил прецизно претставен“, дека организацијата никогаш не земала органи од живи пациенти и дека никој таму никогаш не бил притиснат да го стори тоа.
Случајот е под истрага.
