Нов, петти случај на западнонилска треска регистриран во
земјава. Пациент од струмичко една недела е хоспитализиран на Инфективната
клиника. Во наодот нема податок дали 62-годишниот маж патувал надвор од
Македонија.
Пред 10 дена на инфективна почина 78-годишен жител на
Чешиново-Облешево поради компликации од вирусот.
Директорката на Институтот за јавно здравје, Марија
Андоновска информираше дека починатиот пациент од Западно-нилската треска од
кочанско, при епидемиолошката анкета, дал податок дека не патувал никаде.
-Лицето изјавило дека имало вознемиреност, омалаксаност,
губење на свест и температура. Кај Западно-нилската треска, 80% не дава
симптоми, 20% се со благи симтоми на грип, а кај помалку од еден процент може
да биде зафатен централниот нервен систем, појасни Андоновска во изјава за
медиумите, нагласувајќи дека како институт поседуваат тестови за детектирање и
потврдување на болеста.
Според директорот на Инфективната клиника, Фадил Цана,
најверојатно пациентот живеел сам. Членовите од неговото семејство го нашле
„паднат“.
-Куса е анамнезата, дали и што примил…Никој не може да каже
колку дена претходно бил болен. Кога доаѓа тука, кажува еден ден претходно, а
тој можеби бил повеќе време, информира директорот на Инфективна.
-Опасност од ширење на болеста? Не можам да кажам дека има
или нема затоа што резервоар на тоа се инсектите и преку каснување на комарец…
Секој може да се зарази, но не значи дека секој комарец го пренесува.
Статистиката тоа го кажува. Единственото нешто што може да се превенира е да се
спроведат програмите за дезинсекција, додаде Цана.
Годинава во земјава биле регистрирани 4 случаи на
Западнонилска треска, меѓу кои и сега веќе починатиот од општина
Чешиново-Облешево.