Српскиот пејач Владо Георгиев беше жртва на грабеж во трговскиот центар „Дајмонд“ во Скопје, а непријатната ситуација ја сподели на социјалната мрежа Икс.
Георгиев го оставил својот автомобил на паркингот во трговскиот центар, но додека шетал низ продавниците, крадците влегле во возилото и му украле сè што се наоѓало на задното седиште.
„Им посакувам сè ‘најубаво’ на крадците кои ми упаднаа во автомобилот, кој го паркирав во трговскиот центар ‘Дајмонд’ во Скопје, и ми украдоа еден куп работи од задното седиште, па дури и подароците за децата и пријателите“, напиша иронично пејачот во својата објава.
Инцидентот ја разбуди јавната загриженост за безбедноста во трговските центри и на паркинзите. Сè уште нема информации дали случајот е пријавен во полиција и дали има преземени мерки за пронаоѓање на сторителите.
Ова е само еден од низата слични инциденти кои ги потсетуваат граѓаните и посетителите да бидат внимателни и да не оставаат вредни предмети во своите возила.
