Кој е и за што се терети ШОН "ДИДИ" КОМБС?

Еден од најуспешните музички магнати на сите времиња, Шон Диди Комбс се соочува со повеќе обвинувања за сексуален напад што најверојатно ќе стави крај на неговата тридецениска кариера.

Американскиот рапер <a href="https://www.b92.net/bbc/vesti/64613/son-didi-kombs-za-sta-je-optuzen-americki-reper/vest">беше</a> уапсен на 17 септември под обвинение за сексуална трговија и рекет. По апсењето, повеќе од 120 нови обвинувања се појавија против Комбс, кој се изјасни за невин.

Судијата одби да го ослободи со кауција откако обвинителите тврдеа дека тој е „закана за заедницата“.

Комбс ги отфрли сите обвинувања за погрешно постапување, но се соочува со тешка битка да ја исчисти дамката од неговото име.

Што вели обвинението?

Комбс (54) е уапсен во хотел во Њујорк под обвинение за заговор за рекетирање, принудна работа во секс индустријата и транспорт за проституција.

Федералните обвинители го обвинија за „создавање криминално здружување“ во кој „злоупотребувал, се заканувал и принудувал жени и други луѓе околу него да ги исполнат неговите сексуални желби, да го заштитат неговиот углед и да го прикријат неговото однесување“.

Исто така, се тврди дека Комбс ги дрогирал своите жртви, ја користел својата моќ и статус за да ги „намами“ на долги сексуални дејствија на забавите наречени "Freak Offs".

Се додава дека при претресите во март во домовите на Комбс во Мајами, Флорида и Лос Анџелес, Калифорнија, полицијата пронашла огнено оружје, муниција и повеќе од 1.000 шишиња со лубриканти.

Кој е Шон „Диди“ Комбс?

Комбс е роден во Њујорк во 1969 година и го одгледала неговата мајка Џенис, која работела во образованиe. Неговиот татко, Мелвин, бил поранешен припадник на американските воздухопловни сили, кој се вклучил во организиран криминал.

Идниот музички магнат имал само три години кога неговиот татко бил убиен во автомобил за време на зделка со дрога, откако бил помешан со полициски доушник.

Комбс бил атлетски граден и ја сакал музиката, па уште во тинејџерските денови се прославил играјќи во спотови на британскиот поп-рок бенд Fine Young Cannibals и американската соул дива Дијана Рос.

За време на неговите студии на Универзитетот Хауард во Вашингтон, во раните 1990-ти, Комбс стана познат по организирањето раскошни забави кои понекогаш привлекувале и повеќе од илјада луѓе.

Тој често носел познати музичари да свират на овие забави, што го привлече вниманието на музичкиот продуцент Андре Харел, со кого започна стажирање во неговата издавачка куќа Uptown Records од Њујорк.

Тој го напуштил факултетот поради работа, а набрзо следел неговиот пробив. Комбс потпиша договор со младиот бруклин рапер кој стана светски познат како Биги Смолс. Дебутантскиот албум, кој се смета за еден од најдобрите рап албуми на сите времиња, продаден е во милиони копии.

Во 1997 година, Биги беше убиен во пукање во Лос Анџелес.

Убиството никогаш не е разрешено, но е поврзано со битките на ривалските рап групи за територија и влијание што ја одбележаа деценијата.

Комбс, кој беше сведок на убиството, на Биги ја посвети песната I'll Be Missing You, која стана еден од најголемите хитови на годината и на вистински начин ја лансираше неговата музичка кариера.

Покрај музиката, Комбс се занимаваше и со други бизниси, вклучително и основање сопствен бренд за облека, инвестирање во компанија за пијалоци и ТВ продукција. Американскиот магазин Форбс го вклучи на листата на милијардери во 2022 година.

Дали е ова прв пат Комбс да има проблеми со законот?

Во 1991 година Комбс беше еден од организаторите на настанот во Сити колеџот во Њујорк кој заврши трагично. Речиси 5.000 луѓе се сместија во салата чиј капацитет беше помал од 2.800. Девет лица загинаа таа вечер. Не беше поднесена кривична пријава, но роднините на жртвите ги тужеа организаторите, колеџот и градот Њујорк. Комбс плати 750.000 долари како негов дел од вонсудската спогодба од 3,8 милиони долари.

Во мај 1999 година, тој беше уапсен под сомнение дека физички го нападнал извршниот продуцент Стив Стаут поради несогласување околу музички спот. Комбс се изјасни за виновен за малтретирање и беше осуден на еднодневна обука за управување со гнев. Истата година тој беше обвинет за кривично поседување оружје, но подоцна беше ослободен.

Потоа, во 2015 година, тој го нападна фудбалскиот (американски фудбал, заб. на авторот) тренер на неговиот син по расправија за време на тренингот. Тој подоцна беше уапсен и обвинет за напад со смртоносно оружје, но обвиненијата подоцна беа отфрлени.

Кога се појавија наводите за сексуална злоупотреба

Тој првпат беше обвинет за злоупотреба од неговата поранешна девојка, манекенката Џина Хујн, во 2019 година во интервју со Јутјубер Таша Кеј. Сепак, овие наводи не беа објавени од мејнстрим американските медиуми.

На 16 ноември 2023 година, поранешната партнерка на Комбс, Кеси Вентура, го обвини за силување и сексуална злоупотреба. Таа поднела граѓанска тужба до Федералниот суд во Њујорк, тврдејќи дека Комбс сексуално и физички ја малтретирал за време на нивната 13-годишна врска.

Еден ден откако тужбата отиде до судот, двете страни рекоа дека „спогодбено“ го решиле случајот, иако адвокатот на Комбс рече дека спогодбата „на ниту еден начин не претставува признавање на неправилното дело за кое се товари“. Но истата недела се појавија уште две жени.

Една од нив, Џој Дикерсон-Нил, го обвини Комбс дека ја дрогирал и сексуално ја нападнал во 1991 година кога била студентка. Комбс ги негираше сите обвинувања, додека неговиот портпарол ги нарече „само грабање пари“.

Еден месец подоцна, четврта жена го тужела, тврдејќи дека кога имала 17 години била жртва на „сексуална трговија“ од Комбс и уште двајца мажи и дека тие ја „групно силувале“. Комбс изјавил дека „не направил ништо од наведените ужасни работи“.

Во март оваа година, полицијата изврши претрес на два имоти на Комбс, во Лос Анџелес и Мајами. Шест месеци подоцна, тој беше уапсен во хотел во Њујорк.

На прес-конференција на 1 октомври, адвокатот на Тексас, Тони Базби, рече дека повеќе од 100 луѓе, мажи и жени, поединечно ќе го тужат раперот за сексуален напад, силување и сексуална експлоатација.

Адвокатот Базби додаде дека меѓу наводните жртви имало и оние кои биле малолетни во моментот на наводната злоупотреба.

Ерика Волф, адвокат кој го застапува Комбс, рече дека раперот „недвосмислено и категорично“ ги негира сите наводи, опишувајќи ги како „лажни и клеветнички“. 

Во текот на својата 30-годишна кариера, Комбс неколку пати го менуваше своето уметничко име во обид да го промени својот општ имиџ.

Овој пат ќе мора да направи многу повеќе за да си ја врати репутацијата.