Најголемата германска опозициска партија, Христијанско-демократската унија (ЦДУ), која во принцип ја поддржува одлуката за префрлање на процедурата за азил од ЕУ во трети земји, оценува дека земјите од Западен Балкан не се соодветни за ова.
„Според мене, земјите од Западен Балкан не се соодветни за безбедносниот модел на трети земји“, изјави во вторникот во Берлин шефот на парламентарната група на ЦДУ, Торстен Фреи, пренесоа агенциите.
Тој нагласи дека пред се договорот меѓу Рим и Тирана, за отворање на албански центар за мигрантите кои пристигнуваат во Италија, каде ќе се проверува нивното право на азил, не може да биде модел за Германија.
„Но, Албанија нема да се грижи за тоа и Албанија едноставно ќе ги отвори портите за тие луѓе“, рече Фрај, додавајќи дека Италија нема да се труди да ги врати мигрантите во земјите од кои дошле.
А одбиените баратели на азил, според него, нема да го преминат Јадранот кон Италија, туку ќе се упатат кон Германија преку западнобалканската рута. Тој оцени дека затоа решението со преместување на процедурата за азил во земјите од Западен Балкан не е опција за Германија. Тој оцени дека потенцијалните трети земји треба да бидат земји надвор од Европа.
А Италија, додаде тој, веќе го прекршува правото на ЕУ, бидејќи одбива да ги примени правилата од Даблин и да прифаќа мигранти за кои процедурата за азил ќе треба да се спроведе во самата Италија, како земја каде што првпат пристигнале.
Реализацијата на договорот меѓу Италија и Албанија будно ја следат и другите земји од Европската унија, а интерес пројавила и претседателката на Европската комисија, Урсула фон дер Лајен.
Италијанскиот премиер Џорџо Мелони вчера во италијанскиот Сенат го пофали договорот што нејзината десничарска влада го постигна со Албанија, наведувајќи дека тој може да биде модел за склучување слични договори со други земји кои не се членки на ЕУ, пренесе Анса.
„Италија даде добар пример со потпишувањето на италијанско-албанскиот протокол за обработка на барањата за азил на албанска територија, но под јурисдикција на Италија и ЕУ“, рече Мелони.
Таа рече дека двата бегалски центри предвидени со договорот, во Шенџин и во селото и поранешна воздухопловна база Џадер на северот на Албанија, сега се подготвени и оперативни. Како што претходно соопшти италијанската влада, во нив ќе бидат сместени само машки мигранти од земји кои Италија ги смета за безбедни земји на потекло.
Тие два центри се практично италијански бегалски кампови на албанска територија и според италијанскиот печат, владата во Рим за нив во следните пет години ќе издвои околу 670 милиони евра.
„Тоа е нов, храбар и невиден пат, кој совршено го отсликува европскиот дух и кој содржи се што е потребно да се повтори со другите земји кои не се членки на ЕУ“, рече Мелони.
Албанскиот премиер Еди Рама во интервју за изданијата на германската медиумска компанија ИПЕН МЕДИА изјави дека се залага за сеопфатен договор на Западен Балкан и на целата ЕУ за илегалната миграција, кој досега не е постигнат.
„Ова е неопходно за да се спречат поделбите во дебатата за миграцијата, а особено на Германија и се потребни опции за редовна миграција, заради работните места и благосостојбата“, рече Рама.
Тој рече дека задачата на Италија е да ги носи мигрантите во Албанија со бродови и дека е одговорна за нивна регистрација и обезбедување на потребите, како и за конечната одлука за нивниот статус.
Запрашан како треба да изгледа депортацијата на одбиените бегалци, Рама рече дека идејата на проектот е да се „испрати сигнал до мигрантите кои немаат шанса однапред да добијат азил што ќе ги одврати од преминување“ преку Медитеранот и дека „Во моментов ништо не може да се направи за други работи“, да се каже, бидејќи процесот е сè уште на самиот почеток“.
Рама претходно изјави дека други членки на ЕУ му пристапиле со барање да отвори слични бегалски кампови во Албанија, но тој ги одбил и направил исклучок само за Италија.
Активистите за заштита на човековите права силно го критикуваа италијанскиот проект, нарекувајќи го „италијански Гвантанамо“, по американската затворска база во Куба. Активистите, исто така, се сомневаа во законитоста на италијанскиот план.
Европскиот суд на правдата (ЕСП) претходно изрази сомнеж за законитоста, бидејќи само земја во која на бегалецот не му се заканува прогон или тортура може да се смета за безбедна земја на потекло, а дури 15 од 22 земји кои Италија ги оквалификува како безбедно не го исполнуваат тој услов, пишува агенција ДПА.