<i>Само една недела подоцна, значајната шема на Италија за испраќање мигранти во центрите за притвор и обработка на азил во Албанија веќе е во застој, пишува </i><a href="https://www.politico.eu/article/italy-rome-court-offshore-detention-migrant-albania-illegal-meloni/">Политико.</a>
<i>Единицата за имиграција на Римскиот суд во петокот одлучи дека мигрантите испратени од Италија во Албанија не можат да бидат приведени. Ова значи дека тие мора да бидат ослободени - но бидејќи според договорот не можат да бидат ослободени во Албанија, најверојатно ќе бидат вратени во Италија.</i>
<i>Центрите почнаа да функционираат пред една недела, при што оваа среда со италијански воен брод пристигнаа првите 16 мигранти од Бангладеш и Египет.</i>
Италијанскиот суд вечерва го спречи обидот на десничарската влада во земјата да задржи 12 мигранти затворени во новоотворените центри за мигранти во Албанија, што претставува клучна пречка за плановите на властите да префрлат дел од нивните процедури за азил во оваа балканска земја.
Тие 12 мигранти се дел од првата група од 16 мигранти испратени во центрите за мигранти во Албанија кои беа отворени минатата недела според петгодишниот договор меѓу Италија и Албанија за сместување на 3.000 мигранти месечно кои ги зема од морето италијанската крајбрежна стража.
Идејата е во тие центри да се одлучува дали мигрантите ќе го добијат бараниот азил во Италија или ќе бидат вратени во нивните земји.
Сепак, притворањето на секој мигрант во овие центри, според италијанскиот закон, мора да биде разгледан од специјален суд за мигранти.
Судот во Рим денеска согласно ваквите процедури го отфрли притворот на 12 мигранти, со образложение дека не можат да бидат испратени во земјите од каде потекнуваат, поточно Бангладеш и Египет, бидејќи тие земји не се доволно безбедни.
Приемот на преостанатите четворица мигранти бил одбиен од вработените во центрите за азил, оценувајќи по проверка на нивната здравствена состојба и други проверки дека се работи за ранливи лица.
Моделот на испраќање мигранти во други земји беше пофален од десничарската италијанска премиерка Џорџа Мелони како нов „модел“ за справување со илегалната миграција.
Антиимиграциската партија Лига, дел од десничарската владејачка коалиција, веднаш ја осуди одлуката на судот, велејќи дека левичарските активисти прибегнуваат кон политички мотивирани одлуки.
Италијанската опозиција, составена од партии од левиот центар, оцени дека шемата создадена од десничарската влада е скапа, комплицирана и штетна за правата на мигрантите.
Шеснаесет мигранти, десет Бангладешци и шест Египќани, по наредба на Владата со италијански воен брод се префрлени во Албанија во албанскиот јадрански приморски град Шенжен за да ги поминат процедурите засновани на албанско-италијанскиот договор.
Сепак, по одлуката на судот во Рим, тие мора да бидат вратени во Италија.
Центрите во Албанија ќе ја чинат Италија 670 милиони евра во следните пет години. Со нив управуваат Италијанците, а Албанија обезбедува надворешна безбедност.
<a href="https://vecer.mk/">Фото: </a>Влада на Италија