Градоначалникот на Белград Александар Шапиќ денеска повтори дека смета дека гробот на Јосип Броз Тито од Куќата на Цвеќето треба да се премести на друга локација, исто како и тие на Моша Пијаде, Иво Лола Рибар, Ѓуро Ѓаковиќ, Иван Милутиновиќ од Калемегдан. Шапиќ исто така предложи и четничкиот лидер Дража Михаиловиќ да добие споменик во Белград, јавува дописникот на МИА од Белград.
Шапиќ во пресрет на седницата на Градското собрание изјави дека градските власти не се одговорни за преместувањето на гробот на Тито и другите, и дека последниот збор треба да го има Министерството за култура.
"Она што можам да го кажам е дека јас лично и градските служби ќе помогнеме максимално, доколку се донесе одлука, да се изврши квалитетна ексхумација, овие тела да се префрлат таму каде што ќе одлучиме. Ако можеа Шпанците, по 44 години генерал Франко да го преместат на некои нормални гробишта ... Ние не сме варвари за разлика од истите тие болшевици и комунисти кои ги расфрлаа коските на генералот Дража Михајловиќ за да не знаеме каде се до денес,"<span> </span>рече Шапиќ.
Тој потсети дека во 2003 година бил донесен закон со кој се изедначија Равногорското (четничкото) и партизанското движење во Србија, и најави дека Белград наскоро би можел да добие споменик на четничкиот лидер Драгољуб Дража Михаиловиќ.
-По ова собрание ќе поднесам иницијатива за изградба и поставување на споменик на генералот Драгољуб Михаиловиќ, мислам дека тој конечно треба да има споменик во Белград, тој да биде на достоинствено место во центарот на градот. Мојот предлог ќе биде на Теразијска тераса под Теразијската фонтана, рече Шапиќ.