До Нова година ќе се донесе нов Закон за игрите на среќи, којшто ќе биде многу радикален, строг и ќе ги поправи вашите грешки, истакна денеска од собраниската говорница, вицепремиерот и министер за животна средина и просторно планирање Изет Меџити, кој одговараше на пратеничко прашање поставено од пратеничката, Рина Ајдари од ДУИ, која истакна дека нема ништо од затворањата на казината, кои оваа власт ги најави.
Меџити истакна дека и птиците знаат кој направил во секоја населба или маало да има казино.
– Оваа Влада му има објавено војна на овој бизнис. На првите владини седници ние побаравме автентично толкување и вие почитувани пратеници ќе ни потврдите дека претходната влада, заменик премиерот од претходната Влада на незаконит начин ги потпишал тие договори за казина во Република Северна Македонија. Имајќи го предвид автентичното толкување, донесовме одлука за затворање на тие казина, онлајн казина и од Нова година ќе се донесе Закон за игрите на среќа – вели Меџити.
Пратеничката Ајдари постави прашање до Меџити и дека пред еден ден се согласил со изјавата на Курти со која албанскиот јазик не бил службен.
– Кога сте ја зборувале вистината и дали албанскиот јазик е службен во Република Северна Македонија, бидејќи изјавите на вашите експоненти од коалицијата Вреди се спротивставени – праша Ајдари.
Меџити ѝ одговори да не се мешаат работите, бидејќи тоа што имало унапредување во употребата на албанскиот јазик никој не го негира.
– Дека членовите на Уставниот суд се избрани од вас и ова е факт, дека законот сте го испратиле во Венецијанската комисија и ова е факт. Јавните изјави од вашите министри во последните четири години беа во таа линија дека ќе се апсолвираат забелешките на Венецијанската комисија и за овие забелешки, кои не беа спроведени, иако во тој Закон немаше банкноти и тие работи што беа проблематични и униформите, немаше спроведување на овој Закон. Околу балансерот вашите министри дадоа мислење и тоа е идентично со мислењето на овие уставни судии, кои се на иста линија – вели Меџити.
Тој посочи дека не може да бараат нешто да се реши за три месеци, кога не е решено 20 години.
– Не може нешто да се реши кога власта беше зависна од вас, особено последната власт. Мандатот го потрошивте за да не ја унапредите употребата на албанскиот јазик, мандатот го потрошивте за оној кој ја водеше Владата за развој на казино и на другите бизниси, а правдата и судот ќе го кажат своето – изјави Меџити.
